Ilisimatuutut misissuinerit

Ilisimatuunngorniarlunga (ph.d.) ilinniarninni uppernarsarneqarsimasunik ilisimalikkatigut teologiip aamma ooqattaarinertigut misilittakkallu tunngavigalugit oqaluffiit pillugit ilisimatuutut misissuinerup iluanni maannakkorpiaq ilisimatusarfigalugit suliaqarpunga, taakkua suliassaqarfiit marluk teologiip iluani sammisani nutaaliaanerusuni "teologiimi pisaatsini" aamma "kristumiuussuseq tunngavigalugu inunnik isumaginninnermi ilisimatusaatini" imminnut qanipput.

Ajoqersuutinik malinneqqissaartarnernut imaluunniit teologiimi aaqqissugaanernut oqaluffiit tunngaviusumik teoriitigut annertunerpaamik atassuteqaraluartut, "uppernarsarneqarsimasunik ilisimalikkatigut teologii" aamma ”ooqattaarinertigut misilittakkallu tunngavigalugit oqaluffiit pillugit ilisimatuutut misissuineq" oqaluffiup inuillu piviusumik upperisaannut aallussaannullu tunngassuteqarput (nalitsinniunerusoq). Oqaatsip aamma nassuiaaneratut "teologiimi pisaatsini", oqaluffiup iluani aamma inuiaqatigiinni, atuuffinni aalajangersimasuni teologiip qanoq piviusorsiortumik aallunneqarsinnaanera isiginiarneqarpoq. "Kristumiuussuserlu tunngavigalugu inunnik isumaginninnermi ilisimatusaatini" assersuutigalugu oqaluffinni aamma inuiaqatigiit iluanni inooqataanikkut ilungersunarsinnaasunut ajornartorsiutinullu oqaluffiit, kattuffiit inuillu isiginnittaasiat isiginiarneqarnerupput.

Taaguut "kristumiuussuseq tunngavigalugu inunnik isumaginninneq" marlunnik isumaqartinneqarpoq, tassa "kiffartuussineq" aamma "inuit allaninngaanniit inunnut allanut aggersartinneq", oqariartuummik nassarnikkut imaluunniit iliuuseqarnissaq siunertaralugu, imaluunniit kingulliit taakkua marluk aallunneritigut. Kristumiuussuseq tunngavigalugu inunnik isumaginninnermi ilisimatusaatini assersuutigalugu inooqatigiinni pisariaqartinneqartunut, ajornartuussutinut eqqunngitsuliornernullu assigiinngitsunut oqaluffiit, kattuffiit inuilluunniit qanoq inissisimaffeqarnersut ilisimatusaatitigut sammineqarput.

Teologiimi pisaatsit (kristumiuussuseq tunngavigalugu inunnik isumaginninnermi ilisimatusaatit ilanngullugit) Ilisimatusarfimmi teologiimi bacheloritut ilinniakkami fagitut pingaarnertut ilaapput.

Kalaallit Nunaanni Ilagiit 2017-imi ukiakkut Kalaallit Nunaanni tusagassiorfikkut isornartorsiorneqarput, tassani ikiuiniaqatigiiffiup ilagiit suleqatigisatut maqaasinerarlugillu inuiaqatigiinni isumaginninnikkut ajornartorsiutinik "sumiginnaasutut" "isiginngitsuusaartutullu" oqaatigineqarlutik.  Kisiannili ilagiit sulererpiartarnersut pillugit misissuinernik imaluunniit nassuiaatinik, kiisalu Kalaallit Nunaata nunasiaataareernerani inuiaqatigiit qanoq atugarissaarnissaannut pillugit ilagiit aamma inuiaqatigiit qanoq atuuffeqarnissaannut suussusersiuteqartoqanngilaq.

Ph.d.-p siunertaa - tassaavoq Kalaallit Nunaanni Ilagiit isernartorsiorneqarnertik qanoq isumaqarfigineraat misissorneqarnissaa, aammattaarli inuiaqatigiinni isumaginninnikkut ajornartorsiutinut ilagiit qanoq aamma namminneq kissaatigisamittut tapersiisinnaanerannut apeqqut sammineqarpoq. Ilisimatuutut misissuinermi maannakkut apeqqutaagallartoq tamassumunnga aallaavigineqassaaq: "Kristumiuussuseq tunngavigalugu inunnik isumaginninnerup iluani Kalaallit Nunaanni Ilagiit kinaassusaannut tapersersuinerannullu suut ilisarnaataappat, aamma tamanna nunatsinni nunanilu tamalaani ilisimatusarnermut qanoq tapersiiva?" 

Apeqqummullu tassunga apeqqutit atasut ilanngunneqarput:

• Inuiaqatigiinni isumaginninnikkut oqaluffiup qanoq atuuffeqarnerminik paasinnippa?
• Oqaluffik qanoq periuseqarpa?
• Oqaluffiup periarfissai killissaalu suuppat?
• Kalaallit Nunaata atugarissaarnissaanut ilagiit isumaginninnikkut ingerlassaqarnissaat pillugu oqartussat, suliniaqatigiiffiit naalakkersuisutiguunngitsut, innuttaasullu qanoq paasinnillutillu naatsorsuuteqarpat?
• Kalaallit Nunaannut atatinneqarnera aamma Kalaallit Nunaanni pisaatsit qanoq isillutik nunani avannarlerni nunanilu tamalaani ilisimatusarnermut tapersiisinnaappat?
  

Ilisimatuutut misissuinermi suliaq pitsaassuseq aallaavigalugu misissueriaaseqarnermik ilusilersugaavoq, tassani ornigulluni inuiannik misissuinerit ingerlanneqarsimallutik, misissorneqartullu tassaapput oqaluffiit suliffeqarfiusut pingaarnerit, provsteqarfinnilu pingasunut agguarneqarsimasuni palaseqarfiit assigiinngitsut, takussutissaliorluni ilisimatusarnerit, sumiiffinni nalunaarsuinikkut nakkutilliinerit kiisalu inunnik ataasiakkaanik eqimattannillu ilisimatusarnikkut oqaloqatiginninnerit.