Quppersagaq

Ilinniaqatitit allalluunniit aaqqiagiinngissuteqarfigigukkit ilinniarfinni immikkoortortami pisortamut saaffiginnissinnaavutit.

Ilinniartunik siunnersuisartoq akunnermiliuttuusinnaallunilu aaqqiagiinngissutinik aaqqiiniartuusinnaavoq.

Aaqqiagiinngissut eqqortumik suliarineqarpat tamanna suleqatigiinneq, suleqatigeeriaatsit aaqqiagiinngissutinillu iliuuseqarfiginneriaatsit pillugit paasisaqarfigilluarsinnaavat.

Ajortissimasut aamma illuni amigaataasut pillugit, printerini aamma fotokopimaskiinani Johnimut (john@uni.gl) nalunaarutigineqartassapput, eqqaamallugu kopimaskinap/printerip taaguutaa ilanngutissagakku.

PC sumiiffimmi ajortissimappat IT-mik ikiusartunut nalunaarutigineqartassapput.
Allagit uunga: ikiuut@uni.gl.

Sianerit uunga: 385616 (nal. 8-16).

Atuaruk: "ajutoornermi nalunaarutit".

Qaammatikkaartumik akissarsiavit allagartaat aamma ilinniagaqarnersiutini qiornerit sinneruttut misissorsinnaavatit uani www.sullissivik.gl.

Studenterrådi Pitaq quleriinni allermi elevartorip eqqaani allagarsiiveqarpoq.

Tassani takusinnaavatit studenterrådimit piffissami aggersumi aaqqissuunneqartut ingerlanniakkat.

Illit aammattaaq pappiaqqamut allallugu studenterrådip ingerlassinnaasaanut siunnersuuteqarsinnaavutit, taanna allagarsiivimmi boksimut ikissavat.

Allagarsiussat allat Ilisimatusarfimmi aamma avataani pisussat pillugit saaffiginnittarfiup qanittuani allagarsiivimmi allami malinnaaffigisinnaavatit.

Ilinniartutut periarfissaqarputit allatannik anillatsitsinissamut kopimaskiinat Ilisimatusarfimmi assigiinngitsuni inissisimasut atorlugit.

Taamaattorli malugiuk allaffik/allaffeqarfik immikkut printereqarmata/kopimaskiinaqarmata.

Allakkannik anillatsitsisinnaavutit uku arlaat aqqutigalugit:

• uni.gl / login / print / printerkode pigisat atorlugu iseriarlutit.
• USB printerimut/kopimaskiinamut ikkullugu.

Akigitinneqartut kopi/print qernertoq-qaqortoq ataaseq 10 øre kopi/print qalipaatillugu ataaseq 40 øre.

Saaffiginnittarfimmi kopeerinermut kontunnut minnerpaamik 50 koruuninik akiliissaatit.

Allattanik anillatsitsiniarlutit nammineq printeri immikkut mailikkut tigusimasat atussavat uunga "uniprint" siullerpaamik anillatsitsininni.

Printerinermut kortit immeqqinniarukku taamatuttaaq saaffiginnittarfimmut saaffiginnissaatit.

Matu isertarfik ullut tamaasa ammasarpoq nal. 7.30-16.00.

Kantiina ullut tamaasa ammasarpoq nal. 8.00-15.00.

Atuagaateqarfik ullut tamaasa ammasarpoq nal. 9.00-16.00.

Ilinniarnerup aallartinnerani angalanissamut akiliunneqassaatit illoqarfik angerlarsimaffigisat tassaanngippat Nuuk. Angalanermut akiliunneqarnissamut piumasaqaataavoq ilinniarnersiuteqarnissat aamma ilinniarninni qiukkanik arfineq marlunnik suli sinneqarnerit.

Qinnuteqarnermut immersugassaq aallarnissat sapaatit akunnerinik sisamanik sioqqullugu elektroniskiusumik immersussavat.

Link uunga ikkuguk.

Akiliunneqarluni angalaneq pillugu malittarisassat sukumiinerusumik paasisaqarfigisinnaavatit intranetimi Ilinniarneq Sullissinerup iluani.

Ataatsimoortumik atuartitsineq tassaavoq universitetimi atuartitseriaaseq "nalinginnaasoq", tassani ilinniartitsisup allassimasoq aallaavigisarpaa taanna sammineqartarpoq allanneqarsimasunut allanut naleqqersuullugu.

Naatsorsuutigineqarpoq illit ataatsimoortumik atuartitsinernut piareersarsimallutik peqataasarnissat, taamaaliornikkut ilinniarnerit sapinngisamik annertunerpaamik pissarsiaqarfigissagakku.

Ilisimatusarfiup telefoniata normua pingaarneq tassaavoq 38 56 00.

Immikkuualuttut amerlanerit pissarsiarineqarsinnaapput uani.

Ilisimatusarfimmi ilinniartutut ilinniartoqatinnut atuakkat atorunnaakkatit tuniniarsinnaavatit ugguuna.

Ilinniartutut atuakkat ilinniarnermut atugassat nammineq pisiarineqartussaapput, taamaattorli atuakkanik pisinermut tapinik taaneqartartumik tapiiffigineqassaatit semesterimut ataatsimut 1.100 kr.-nik.

Ilinniakkamut immikkoortortaqarfimmi aqutsisup ilinniarnerup ingerlanerani atuakkat atorneqartussat allattorsimaffiat ilinniartunut piariissavai ilinniarnerup aallartinnissaa sioqqutingaatsiarlugu.

Atuakkamik pissarsiniarninni ajornartorsiuteqaruit, tamanna illit nammineq akisussaaffigigit aallaaviuvoq, taava tamatigut atuagaateqarfimmut ilitsersorneqarnissannut/ikiorneqarnissannut saaffiginnissinnaavutit.

Ilinniartitaanerit ilaat atuariartortussaatitaanermut maleruaqqusaqarput, taakkua pillugu ilisimatinneqassaatit atuarnerit aallartippat.

Taamaattorli eqqaamajuk atuarnermi peqataasarnerit guultitut naleqarput ilinniarninni ajunngitsumik ingerlassaguit, taamaattumik sapinngisamik sunut tamanut atuariartortassaatit.

Ilinniarnerpit ingerlanerani fagini atuagassatit amerlaqimmata, sapinngisamik pitsaanerpaamik atuariaaseqarnissat pingaaruteqarpoq.

Ilinnut iluaqutaasinnaavoq paasissallugu atuagassat sorleq qaasiortumik atuassanerlugu, kiisalu atuagassat sorleq sukumiinerusumik atuartariaqarnerlugu.

• Pilertortumik atuarneq: Ilinnut iluaqutaassaaq allanneqarsimasut atuareersimasatit pappiaqqamik qallertarukkit. Taamaalioruit taava isitit atuareersimasannut uteqqiassanngillat taamaattumillu atuagassatit pilertornerusumik atuarsinnaassavatit.
• Atuagassanik atuarnissat pilersaarusioruk: Allanneqarsimasoq atuagassat atuarlugu aallartikkuit, ikiuutaalluarsinnaasut pingaaruteqartut tassaapput aallarniut aamma ujarliutit (imarisai) allassimasut. Tassani pingaaruteqarportaaq ukkussilluarnissat aamma taamaalillutit ajornannginnerusumik eqqaamasaqarsinnaassaatit, illit nammineq eqqarsaatigigukku sooq taannarpiaq atuarnerlugu.

Universitetimi arlalinnik sumiiffissaqarpoq tassani gruppini suleqatigiissinnaallusi imaluunniit illit nammineq kisimiillutit atuarsinnaallutit.

Atuagaqateqarfimmi ilinniarnissamut aamma atuarnissamut 1. salimi periarfissaqarpoq.

Taakkua nammineq piumassuseq tunngavigalugu atorneqarsinnaapput siulliit siulliullutik periuseq atorlugu. Studiekortimik peqaruit aammattaaq atuagaateqarfik ammasarfiisa atavaatigut atorsinnaavoq studiekort "matuersaatitut" atorlugu.

Eqqaamallugu atuinissi kingornatigut torersaasassagassi.

Ilinniartitaanerit amerlanerit semesterinut tamanut atuartitsinissamut pilersaarummik taaneqartartumik suliaqartarput, tassani ilinniartoq pitsaasumik takussutissinneqarpoq semesterimi sammineqartussat pillugit, tassunga ilanngunneqartarput ilinniartitsisussat, fagit suuneri aamma ilinniagaq pillugu paasissutissat tamatumunnga attuumassuteqartut.

Atuagaateqarfik pillugu paasissutissat tamarmik uani pigineqartut takusinnaavatit.

Studiekortimik atuuttumik peqaruit atuagaateqarfiup ammarsarfiata avataani tamatigut atorsinnaavat. Atugaateqarfimmut matu ammassavat kortit atorlugu torsuusami saamiup tungaaniittumi. Eqqaamajuk tamanna qimatsinnagu atukkatit torersaqqaartussaagakkit.

Naatsorsuutiginngisannik studiekortissat sivisuallaamik utaqqigukku, taava atuagaateqarfimmi atuakkanik atorniarnissamut allagartamik utaqqiisaasumik tunineqarsinnaavutit.

Atuagaateqarfimmiippoq ini atuakkanik atuarfissiaq tassani aviisinik aamma atuagassianik atuarsinnaavutit. Tassaniipput aammattaaq suliaqarfiusinnaasut immikkoortut, tassani illit PC-t atorlugu sulisinnaavutit.

Tamakkua saniatigut Ilisimatusarfiup atuagaateqarfiannut atuakkamik pisisoqarnissaanik siunnersuuteqarsinnaavutit atuagaq atuagaateqarfimmi pigineqanngippat.

AG aamma Sermitsiaq atuagaateqarfimmi 1. salimi atuakkanut ilioraaffimmiipput.

Atuagassiat nutaajunerpaat ilisivinni uingasuniipput atuagaateqarfimmi 1. salimi.

Normut pisoqaanerit atuagaasivinni majuartarfiit talerpiata tungaani inissinneqarsimapput.

Taamaattorli Ilisimatusarfiup atuagassiaatai annillugit atorniarneqarsinnaanngillat.

Inassutigaarput scanneri/kopimaskina atussagit.

Soraarummeerluni allagartartaartitsinermi ilaanissaq angumeriniaraanni bachelorinngorniartumut suliassiissummik specialimillu allaaserinninnermi tunniussivissaq kingulleq januaarip qiteqqunnerani maajillu qiteqqunnerani pissaaq.

Ulloq tunniussivissaq allaaserinninnermi siunnersortigisap isumaqatigineratigut ullulerneqassaaq, ullulerneqarpallu immikkoortortami aqutsisumut nalunaarutigineqassalluni.

Upernaaq manna tunniussivissaq kingulleq tassaavoq maajip 15-iat 2023.

Bussit ingerlaartut Ilisimatusarfiup eqqaanut unittartut tassaapput:

• Angalasoq 2 (minutsikkaat: ’10, ’30, ’50)
• Angalasoq 3 (minutsikkaat: 08:04 aamma 09.14 kingornatigut nal. akunnerit tamaasa 18:14 tikillugu)

Bussit ingerlaarfii tamaasa takusinnaavatit uani.

Ilinniarnerup aallartinnginnerani e-mailikkut allagarsiffissannik tunineqareersimassaatit kiisalu tassunga isissutissaq allat ilisimasassarinngisaat illit atuutilersissavat.

Isissutissat puigorukku ikiortissinnaavutit uunga: ikiuut@uni.gl allallutit.

Pisussaavutit akuttunngitsumik e-mailit atuartassallugu.

ECTS (European Credit Transfer System), tassaavoq naatsorsueriaaseq ilinniakkamik ingerlaqqinnissamut atorneqartartoq EU-mi ilinniakkanik ingerlaqqiffiusunik ilinniarnermi naammassisimasanik nuussinermut atorneqartartoq.

ECTS-point tassaavoq uuttuut tassani taamaallaat suliap annertussusiaq taaneqartarluni, imaanngitsoq ilinniarnerup ingerlasimanerata qanoq ajornartigisimanera/nalunartigisimanera.

Fagit imaluunniit kursusit ataasiakkaat ilinniagaqarnermi ingerlanneqartut pointinik kisitsisitalerneqartarput, tassani ilisarnaaserneqarpoq ilinniartup suliaqarnissaata annertussusia ilinniarnermi ingerlanneqartunut ataasiakkaanut naammassinninnissamut tunngatillugu.

Ilinniartutut ECTS-pointit tunniunneqartarput kursusinut ataasiakkaanut naammassineqarsimasunut aamma soraarummeernernut angusiffiusimasunut.

Semesteri ataaseq tamakkerlugu ilinniarsimasaq ECTS-pointinik 30-nik naleqarpoq.

Ilinniarnerpit nalaani qitornartaarnermut atatillugu marlunnik periarfissaqarputit:

• Ernininnut atatillugu atuanngiffeqarsinnaavutit kommunimut erninermut atatillugu aningaasarsiaqarlutit, kisianni piffissami tassani ilinniagaqarnersiuteqassanngilatit immaqalu kollegiemi najugaqarsinnaassallutit. Toqqarukku illoqarfimmut angerlarsimaffigisannut uterlutit erninermut atatillugu atuanngiffeqarniarlutit, angalanermut akiliunneqarnissamut pisinnaatitaaffeqarputit.
• Ilaannakortumik ilinniarnerit ingerlatiinnarsinnaavat ilinniakkanni (minnerpaamik semesterimi ataatsimi 20 ECTS), taava taamaalillutit ilinniagaqarnersiutitit pigiinnassavatit aamma kollegiemi ineqarnerit.

Arlaat toqqarnerit apeqqutaatinnagu immersugassaq immersussavat uani.

Ilinniartut studieordninngi malillugu holdinut ilannguffissaannut ilannguttarpagut- immikkut toqqakkat "Valgfag" minillugit.

Taakku nammineerlutit ilannguffigissavatit. Illit nammineq akisussaaffigaat holdinut eqqortunut ilanngussimanerlutit qulakkiissallugu.

Aaqqitassaqarpat ilinniakkannut ataqatigiissaarisumut, immaqaluunniit studieadm@uni.gl - imut saaffiginnissaatit.

Pingaaruteqarpoq Lectiomi paasissutissat eqqortuunissaat, taakkuummata soraarummeernernut ilannguttussanik nalunaarsuigaangatta malittakkagut.

Illit ilinniartutut sumiiffimmut ilisiffigineqartussamut angalanerit akilerneqarsinnaavoq.

Atuaruk: angalanissamut immersuiffissaq immersoruk.

Ilaquttat qanigisat tassaapput: angajoqqaat, anaa/aataa, qatanngutit aamma nammineq qitornat. Soraarummeertussaaguit taava periarfissaqarputit taakkua piffissamut allamut kinguartinnissaannut, taamaattoqartillugu soraarummeernermik misiliisimasutut ilanngunneqassanngillat.

Ilinniagaqarnermi taarsigassarsianik qinnuteqaateqarsinnaavutit immersugassaq immersorlugu uani www.sullisivik.gl.

Taamaanngippat ilinniagaqarnersiuteqartitsivik attaveqarfigisinnaavat: usf@nanoq.gl.

Ingerlaqqiffiusumik ilinniarfinni tamani aallaavigineqarpoq ilinniarnersiuteqarnissamut pisinnaatitaaffeqarnissaq ilinniarnerup nalinginnaasumik naammassiffissaata sivisoqataanik "ukioq kinguaattoorfik" ilanngullugu.

Ilinniarnersiutit siumoortumik tunniunneqartarput maannakkut qaammammut 4.873 kr.

Qiortakkanik aaqqissuussineq ajornanngitsuuvoq illit nammineq ilinniagaqarnersiutinik aqutsininnut atorsinnaasat.

Qiortakkanik aaqqissuussinermi killissarititaapput ilinniartumut ataatsimut 82-it, qiorneq ataaseq tassaavoq qaammammi ataatsimi ilinniagaqarnersiutit. Taamaattorli tamatuma kingunerissanngilaa ilinniarnermi, ukiunik sisamanik sivisussusilimmi qiornerit 82-it atussagitit.

Ilinniagaqarnersiutinik pisartagaqarsinnaavutit ilinniarnerup sivisussusissaatut naatsorsuussamut + qaammatit aqqaneq marluk ("ukioq kinguaattoorfik").

Namminersorlutik Oqartussat ilinniagaqarnersiutit pillugit nalunaarutaat nassaarissavat uani: ilinniagaqarnersiutit pillugit nalunaarut.

Ilinniakkat aallartereerlugu paasilerpiuk ilinnut tulluutinngitsoq, allamillu pilerigisaqarlutit?

Ilinniakkamut allamut nuukkusukkuit nalinginnaasumik www.sullissivik.gl aqqutigalugu qinnuteqassaatit.

Taava qinnuteqaatit immikkoortortami pisortamiit nalilersorneqassaaq.

Akuerisaassaguit soraarummeernerillu naammassereersimagukkit angusiffigisavit ilinniakkamut nutaamut nuunnissaanut qinnuteqarsinnaavutit.

Institutråd soraarummeerfinnik angusiffigeriikkanik nuutanik (merit) akuersisinnaavoq, tassa ilinniakkanik aaqqissuussinerni Ilisimatusarfimmi imaluunniit universitetini allani siusinnerusukkut soraarummeernermi angusiffiusimasunik.

Immersugassaq uani nassaarisinnaavat.

Immersugassaq immersoriarlugu immikkoortortami pisortamut tunniutissavat, nalilersorneqarnissaanut taava suliaq aallartissaaq.

Ilisimatusarfimmut tunngasoq nanissavat uani.

Ilisimatusarfimmi initigut killiussat pigineqareerput ilinniarnermi avatangiisit pitsaasut pilersissallugit.

Illit ilinniartutut aallartitseqataasussanut ilaassaatit ilinniartut avatangiisianni tassani ingerlatsisoqarnissaanik qulakkeerinninnermut.

Ilinniartut allat peqatigalugit atuarnermi- ilinniaqatigiinnermi pilersitsigit, avataaneersunit oqalugiartussanik imaluunniit oqallinnermi peqataasussanik ujartuigit.

Aallartinniakkat (tamangajammik) atorsinnaapput, taamaattorli ingerlatsinerit/aaqqissuussinerit annertunerusut pillugit Pitaq attaveqarfigiuk.

Ilinniakkat ilaanni ilinniarnermik ataaqatigiissaarisoqarneq atorneqarpoq, taanna ilinniartut qaninnerpaatut attaveqarfigaat.

Ilinniarnermik ataqatigiissaarisoq "illumi ataatsimiinnernik" aaqqissuussisarpoq aamma ilisimalluarpai ilinniarnermi skemani aaqqissuussineq, soraarummeernissamut pilersaarut il.il.

Paasissutissat ilinniakkannut tunngasut takukkit.

Ilinniarnersiutinik pisartagaqarnissamut piumasaqaataavoq ilinniakkamik ingerlatsinermut piumasaqaatinik illit naammassinninnissat. Ingerlaqqiffiusumik ilinniakkani semesterimi ataatsimi ECTS 30-t naatsorsuussaapput. Fagitit tamaasa angusaqarfiginngikkukkit imaluunniit soraarummeerneq pinngitsoorukku, taava ilinniakkamik ingerlatsininni kinguaattoorsinnaavutit.

Illit ilinniakkami ingerlatanni qaammatinik 12-inik kinguaattooruit – taakkua assigaat 60 ECTS-point - taava ilinniagaqarnersiuteqarnissat annaassavat.

Taamatuttaaq kollegiemi ineqarnerit annaasinnaavat, ilinniakkami ingerlatanni ingerlatsinngitsutut ilinniarfiup isigippatit.

Februarimi aamma augustimi ilinniarninni siumukarnerit misissorneqartarpoq, tassa imaappoq qiornerit qanoq amerlatigisut atorsimaneritit, taakkununnga sanilliunneqartarput ECTS-pointit qanoq amerlatigisut angusimaneritit.

Qanittukkut ilinniarnermik ingerlatsinermut uppernarsaat ajornanngitsumik qanoq pissarsiarisinnaanerit pillugu paasissutissiisoqassaaq, taanna oqartussaasunut tamatuminnga ujartuisunut illit takutissinnaavat.

Ilinniartitaanerup aaqqissugaanera tassaavoq maleruagassat tunngaviat, tassani allanneqarput fagit suut atuassagitit, tulleriinneri qanoq ingerlassanersut aamma qanoq soraarummeernerit ingerlatissanerit.

Isumassarsiatsialaavoq ilinniartitaanerup aaqqissuunnera ilinniarnerpit aallartinnerani atuassallugu aammattaaq akuttunngitsumik taanna uteqqiaffigisassallugu, taamaalillutit illit nammineq ilinniakkannik ingerlaninni siuariartornerit malinnaaffigissagakku.

Ilinniakkanut tamanut ilinniartitaanerup aaqqissugaanera nittartakkami uni.gl-imi nanisinnaavaat imaluunniit intranetimi.

Ilaannikkut ilinniartut namminneq aaqqissuussiniarlutik aallartitsisarput. Imaassinnaavoq ILLIT aaqqissuussinissamik isumassarsisimasutit piviusunngortikkusutannik! Taamaattoqarpat taava studenterrådip Pitap ataatsimiinneranut peqataasinnaavutit, tassanilu illit isumassarsiatit saqqummiussinnaavatit.

Eqqaamajuk Studenterrådi Pitaq pingasunngornerit tamaasa nalunaaqutaq 12 ataatsimiittarmat quleriit pingajuanni allaffimmi imaluunniit Pitarfimmi. Ataatsimiinnerit ilinniartunut tamanut ammapput.

Ilinniarnerpit nalaani ikiorneqarnissat, siunnersorneqarnissat imaluunniit ilitsersorneqarnissat pisariaqartikkukku ilinniartunik ilitsersuisoq Augustine Berthelsen attavigisinnaavat: studievejleder@uni.gl.

Ilinniartunik ilitsersuisoq aamma periarfissaqarpoq ilinniartunik siunnersuiffimmut tarnip pissusaanik ilisimasalimmut innersuussissalluni.

Aamma illit nammineq inniminniisinnaavutit ugguuna.

Ilisimatusarfimmi sikaaveqarpoq 56 missaannik amerlassusilinnik ilinniartunit atorneqarsinnaasunik, pedelimit kode pissarsiaralugu atuisoqarsinnaavoq.

Paasissutissanik immersuereernerup kingornatigut kodemik pissarsisoqassaaq.

Sikaaviit ukiumi ilinniarfiusumi ataatsimi atorneqarsinnaapput, tassa imaappoq septemberimit julimut, tamatuma kingornatigut sikaavik imaaqqinneqassaaq.

Ilinniartunut sullisisunut ilinniartitaanermut tunngatillugu pissutsinut tamanut tunngasumik saaffiginnissinnaavutit soorlu ilinniagaqarnersiutit, angalanerit, unikkallarneq, peqataannginnissaq, ECTS aamma ilinniarnermi siuariartorneq il.il.

Ilinniartunut sullissisut ilinniarfeqarfimmi Ilimmarfimmi aamma Ilinniarfissuarmi pissarsiarisinnaavatit – aamma attaveqarfigisinnaavatsigut ugguuna: studieadm@uni.gl.

Ilinniartunut sullissivik ammasarpoq ataasinngornermit – tallimanngornermut nal. 08.00 - 16.00.

Kikkut tamarmik periarfissaqassapput ilinniagaqarlutik naammassinninnissamut, aamma piginnaasamikkut timikkullu akornuteqaraluarunilluunniit.

Soorlu assersuutigalugit naqinnernik ilisarinnissinnaanikkut ajornartorsiutillit (dysleksi) aamma tusaasamikkut isigisamikkullu akornutillit.

Tamakku eqqarsaatigalugit ikiorsiissutinik Ilisimatusarfimmi periarfissaqartitsivugut ataani misissuataarneqarsinnaasunik:

• IPIS aqqutigalugu siunnersorneqarnissamut qinnuteqarsinnaavutit. Taanna aqqutigalugu immikkut atortorissaaruteqarnissannik kommunimut aningaasatigut tapiissutinik qinnuteqarsinnaavutit.
• Soraarummeernerpit sivitsorneqarnissaa qinnutigisinnaavat. Qinnuteqaatit takussutissanik uppernarsaatinik ilallugu studieadm@uni.gl-imut nassiutissavat. Qinnuteqarnermi immersugassaq ataaniittoq takuuk.
• Allattariarsornermi misilitsinnerni immikkut atortoqarnissat kiisalu oqaluttariarsornermi misilitsinnerni immikkut piareersarnissat qinnuteqaatigisinnaavatit.

Ilanngullugittaaq ilisimassavatit IT atorlugu atortorissaarutit immaqa iluaqutigisinnaasatit. Ilaat ukunani nassaarisinnaavatit:

• Kalaallisut allassimasunut atuffat
• Danskisut allassimasunut atuffat
• Tuluttut allassimasunut atuffat
• Microsoft wordikkut atuffassissummut ilitsersuut

Amerlanerulernissaat sulissutigineqarpoq.

Aammattaaq Ilinniartunut siunnersorti piareersimajuaannarpoq saaffigineqaruni periarfissannik nassuiaassinissaminut. 

Immikkut pisariaqartitsisut soraarummeerneranni periusissat 

• Soraarummeernissamut pineqartumut ilinniartoq immikkut pineqartariaqarnini pillugu ilinniartunik aqutsisoqarfimmut qinnuteqassaaq immersugassaq una atorlugu. Qinnuteqaat uunga nassiunneqassaaq: eksamenskontor@uni.gl.
  • Qinnuteqarnermi siullermi ilinniartoq ilinniartunik aqutsisoqarfimmi akisussaasumik oqaloqateqatigineqassaaq.
  • Siusinnerusukkut akuerineqareersimasuni oqaloqatigineqaqqinnissaq pisariaqartanngilaq.
  • Qinnuteqarnissamut piffissaliussaq - soraarummeernissaq qaammammik ataatsimik sioqqullugu.

• Ilinniartup pineqartup immikkut pisariaqartitai naapertorlugit ilinniartunik aqutsisoqarfimmi sulisoq immikkoortortami pisortamut innersuussissaaq soraarummeernerup naammaginartumik pissusissamisoortumillu ingerlanneqarnissaanut.
  • Immikkoortortami pisortap qinnuteqaat akuerisinnaavaa itigartilluguluunniit.
• Ilinniartunik kiffartuussiviup aalajangerneq ilinniartumut ilisimatitsissutigissavaa.
• Ilinniartunik kiffartuussiviup soraarummeertitsisussaq ilisimatissavaat ilinniartoq immikkut pisariaqartitsisoq soraarummeertussaq sivisunerusumik piareersarnissamut akuerineqarsimasoq - pingaartumik oqaluttariarsorluni soraarummeernissani pisariaqarpoq ilisimassallugu. Taakkunani soraarummeertitsisup nammineerluni aaqqissuuttarmagit.

Tulleriiaarneri

Ilinniartoq immikkut akuerineqaqqulluni qinnuteqarpoq - Ilinniartunik kiffartuussivimmi suliarineqarsinnalugu Immikkoortortami pisortamut innersuussineq ingerlatinneqassaaq - Immikkoortortami pisortaq akuersissaaq itigartitsilluniluunniit - Ilinniartunik kiffartuussiviup aalajangerneq pillugu pineqartut ilisimatissavai.

Soraarummeernerup sivitsorneqarnissaani periusissat

• Allattariarsorluni misilitsinneq: Soraarummeertut allat soraarummeerutiminnik tunniussinerminni ajoqusersuippata soraarummeernerup sivisussusaa 25% -imik sivitsorneqarsinnaavoq, taassumalu saniatigut aamma soraarummeerneq minutsinik 30-nik sivitsoqqinneqarsinnaalluni. Taassuma saniatigut immikkut atortorissaaruteqarsinnaaneq akuerineqartarpoq.
  • Assersuutigiinnarlugu nal.akunnerini 4-ni misilitsinneq nal.akunnernut 5.30-nut sivitsorneqarsinnaavoq. 
• Allattariarsorluni misilitsinneq piareersarnertalik: Piareersarneq 50 %-imik sivitsorneqarsinnaavoq.
  • Nalinginnaasumik 30 minutsini piareersarneq taamaalilluni 45 minutsinngorlugu sivitsorneqarsinnaalertarpoq. 
• Sap.ak. ingerlanerani soraarummeerneq: Soraarummeerutissap suliarinissaanut piffissaliussaq ullunik marlunnik ilaneqarsinnaavoq.
• Qaammatip ingerlanerani soraarummeerneq: Soraarummeerutissap suliarinissaanut piffissaliussaq sap.akunneranik ataatsimik ilaneqarsinnaavoq.

SUS ingerlanneqartarpoq ilinniartunut ukiumi siullermi ingerlasunut ilinniartitaanermi ilinniartitsisunit ingerlanneqartarluni.

Ilinniartut sinneri SUS-imi oqaloqatigiinnissamik kissaateqarsinnaasut ilinniarnermi ataqatigiissaarisumut saaffiginnissinnaapput.

Uani www.uni.gl ilinniartutut suliffissaasinnaasut, praktikerfissat aamma nunani allaniissinnaaneq pillugit paasiniaasinnaavutit, tamakku quppernerup saqqaani akuttunngitsumik saqqummersinneqartarput.

Ilinniartunik siunnersuisartut suleqatigalugit ilinniartut ilinniakkaminnik ingerlataminni ECTS pointiminnik kinguaattoorsimasut iluarisimaarinninneq pillugu oqaloqatiginiarlugit aggersartarpavut.

Oqaloqatigiinnerni taakkunani ilinniarnermi kinguaattoornermut patsisaasinnaasut qulaajarniartarpavut, kiisalu ataatsimoorluta iliuusissat nassaariniartarlutigik taamaaliornikkut ilinniartut siumut saallutik ingerlaqqissinnaaniassammata.

Semesterit naammaassinerisa kingorna allakkamik nassinneqartarumaarputit ECTS angusiffigisimasatit pillugit.

Kinguaattoorsimaguit ilinniartunik siunnersuisumit aggersarneqassaatit.

Ilinniartunik sullissivimmi ilinniartut ilinniakkaminnik ingerlatsiinnarnissaat assut perusupparput aamma sapinngisatsinnik ilinniakkaminnik naammassinninnissaannut ikiorusullutigik.

Politikki manna Ilisimatusarfimmi ilinniakkani tamani atuuppoq.

Politikki ilinniartunut, ilinniartitsisunut Ilisimatusarfimmilu ilinniartitsinermi peqataasunut allanut isumannaallisaataassaaq.

Ilinniartoq aalajangiisassaaq ilinniartitsineq streamerneqarsinnaassanersoq, immiunneqarsinnaassanersoq, videuliarineqarsinnaassanersoq aamma ilinniartitsineq – ilinniartitsisullu ilinniartitsissutigisai (ass. PowerPointimi takutinneqartut, allattarfissuarmi allattugai il.il.) assilineqarsinnaassanersut.

Ilinniartoq ilinniartitsinermik streameerusukkuni, immiusserusukkuni, videuliorusukkuni, assileerusukkuni taamaaliornissaminut ilinniartitsisumit akueriteqqaartariaqarpoq.

Ilinniartitsineq streamerneqarsinnaappat, immiunneqarsinnaappat, videuliarineqarsinnaappat assilineqarsinnaappat, taava:

• Ilinniartup immiussani allanut ingerlateqqissanngilai – taamaallaalli nammineq atugassarissavai.
• Immiussinermi peqataasut tamarmik saqqummiunneqarnissamut aatsaat akuersippata allanut ingerlateqqinneqaqqusaapput.

Peqataasut akuersisimasut akuersissutiminnik qaqugukkulluunniit atuukkunnaarsitsisinnaapput.

Ilinniartoq ilinniartitsinermik streamiinissamik, immiussinissamik, videuliornissamik assiliinissamillu inerteqqummik unioqqutitsippat – ilinniartoq taamaaliortoq tamanna pillugu ingerlaannaq paasitinneqassaaq.

Ilinniartoq arlaleriarluni unioqqutitsippat rektorimut nalunaarutigineqarsinnaassaaq, taassuma perorsaatissinneqarnissaa siunertaralugu.

Ilinniartut kanngunarsagaallutilluunniit ajorsaarneqarsimasut kajumissaarneqarput ikiortissarsiussasut tapersersortissarsiussasullu.

Illit ilinniartutut ilinniartunik siunnersuisartumik ingerlateqqitassaanngitsut pillugit pisussaaffittaqanngitsumik oqaloqateqarnissamut periarfissaqarputit - qanorluunniit nalaataqarsimagaluaruit, aamma nalornigaluaruilluunniit.

Ilinniartunik siunnersuisartunut saaffiginnissutit tamarmik ingerlateqqitassaanngitsuupput, immaqalu peqatigiillusi aaqqiissutissarsisinnaassaasi.

Ullaakkorsiutinik, ulloqeqqasiutinik il.il. assigiinngitsunik neqerooruteqarpoq akisuallaanngitsunik.

Ullut tamaasa ammasarpoq nal. 8.00 - 15.00-ip tungaanut.

Atuaruk.

Fagit ilaat GGS skala atorlugu nalilerneqartarput, allat nalilerneqartarput angusivoq/angusinngilaq.

Allattariarsornermi karakterit ilinniartumut, soraarummeernerup kingornatigut kingusinnerpaamik sapaatit akunneri sisamanngorneranni, saqqummiunneqartarput.

Wiseflow nakkutigiuk tassani karakterit nalilersorneqareerpat takusinnaavat.

Kinguaassiuutitigut innimiilliornikkut suliffinni sulinermilu isumannaallisaanikkut inatsimmik naligiissitaanissamullu inatsimmik unioqqutitsisoqarsinnaavoq, soorluttaaq aamma pinerluttulerinermi inatsimmik unioqqutitsisoqaratarsinnaasoq.

Matumani pineqarsinnaapput oqaatsikkut iliuutsikkulluunniit qaninniarfigineqarnerit kissaatigineqanngitsut, narrujuumminartut, qamuuna annernartut assinginillu akineqanngitsut.

Taakku tassaasinnaapput qaninniarpaluttumik kunissinerit, killissanik qaangiilluni attuualaarinninnerit pattalaarinninnerillu, oqaaseqarnerit, apeqquteqarnerit kajumissaarinerillu, aamma telefonikkut, e-mailikkut allakkatigulluunniit qaninniarluni malersuinerit.

Matumani pineqarputtaaq kannguttaatsumik quiasaarinerit, assinik allanillu pornografiimut tunngasunik takutitsinerit, taakku kissaatigineqanngippata takutitsivigineqartullu mamiatsaatigippagit.

Kinguaassiuutitigut innimiilliorfigineqaruit ilinniarfinni immikkoortortami pisortamut ilinniartunilluunniit sullissivimmut saaffiginnigit.

Kollegiemi ini pillugu apeqqutit tamarmik saaffiginnissutigineqassapput uunga: kafadm@kaf.gl.

Ilinniartunik sullissiviup kollegieni inissanik tunniussisarneq aamma allaffissornikkut suliaqarneq sunniuteqarfigisinnaanngilaa.

Ilinniarneq Sullissinermi Lectio (ilinniartitsinermi allaffissornermi atortoq) Ilisimatusarfimmi aasap ingerlanerani atuutilersittussaavaa.

Paasissutissanik sukumiinerusunik septembarimi atuartitsineq aallartippat malinnaatinneqarumaarputit.

Ilisimatusarfimmit aningaasaateqarfiit ilinniartut legatinik/aningaasaateqarfinnit tapiiffigineqarnissamut qinnuteqaateqarfigisinnaasaat ataatsimoortillugit takussutissiarineqarput.

Takuuk una www.uni.gl.

Ilinniakkat amerlanersaanni sivisunerusumik ilinniartuusimasut ilinnialerlaanut mentoriorusuttut suleqatigineqartarput.

Taakkua ilisimasaannik misilittagaannillu atorluaallutit Ilisimatusarfimmi ilinniarninnik ajornaallisaagit. Sapaatip-akunnerani aallarniutaasumi mentoreqarnermik aaqqissuussaq pillugu paasissutissinneqarnerujumaarputit.

Mentorip suliassai mentorillu ilinnut qanoq iluaqutaasinnaanera uani allattorsimapput:

• Ilinniartutut inuunermut tikilluaqqusineq – ingammik ilinniarnerup aallarteqqammernerani
• Ilinniaqatigiinnik ataqatigiissaarisoq / ilinniaqatigiinnut akisussaasoq (ikinnerpaamik ilinniartut 4-6)
• Saqqummiussisarneq
• Sulianut attaveqatigiinnissamullu tunngasunik aaqqissuussaqarneq
• Ilaatigut opgaveskrivningimi, ilinniakkap qanoq aaqqissuunneqarneranik misissuinermi, legatinik aningaasaliissutisinissamillu qinnuteqarnermi il.il. siunersiueqatigisagaq
• Ilinniartunut tapersersorti

Institutråd naammasseriikkanik nuutanik (merit) tunniussisinnaavoq tassa ilinniakkanik aaqqissuussinerni Ilisimatusarfimmi imaluunniit universitetini allani siusinnerusukkut soraarummeernermi angusiffiusimasunik.

Immersugassaq uani nanisinnaavat.

Ilinniartut Office 365 namminneq PC-minnut aamma/imaluunniit Mac-iminnut aasinnaavaat ikkullugulu. Office 365 atortunut tallimanut ikkunneqarsinnaavoq.

Programmi akeqanngilaq Ilisimatusarfimmi ilinniartuunerit tamakkerlugu. Iserit uunga http://portal.office.com. 

Loginissaatit illit brugernavn@uni.gl atorlugu, e-mailadressivit assigaa.

Office-mik allamik ikkutaqarsimaguit Office 365 ikkutsinnagu taanna peeqqaassavat.

Atuaruk.

Ilisimatusarfimmit eqqumaffigineqarpoq interneti, videut, mobiltelefonit e-mailillu periaatsit nutaat atorlugit tarnikkut nakuusernissamut periarfissiisartut.

Elektronikkitigut nakkarsaaneq tassaavoq ilinniartumut naleqqutinngitsumik pissusilersortuarneq, taakkua ilinniarnerannut tunngasumik internetikkut nittartakkani, chattertarfinni, videukkut mobiltelefonikkullu nittarsaassineq, ilinniartumik immikkoortitsinissaq, nikanarsaanissaq, sanngiillisitsinissaq sioorasaarinissarluunniit siunertaralugu.

Nakuuserfigineqarnissamik sioorasaarneqaruit – elektronikkitigut nakkarsarneqaruit ilinniarfinni immikkoortortami pisortamut ilinniartunilluunniit sullissivimmut saaffiginnigit.

Atuaruk.

Eqqarsaatigigukku nunami allami semestereqarniarlutit imaluunniit praktikerniarlutit, taava nunanut tamalaanut ataqatigiissaarisorput Mathias mtc@uni.gl saaffigiuk siunnersortinniarlutit aamma ilitsersortinniarlutit.

Illit nammineq napparsimaleruit imaluunniit ilaquttavit qanigisavit napparsimanerani imaluunniit toqukkut qimagunnerani, taava periarfissaqarputit immikkut qiugassanik qinnuteqaateqarnissamut taamaalillutit toqqissillutit ilinniarnersiutitit pigiinnarsinnaavatit, naak pissutsit ilinnut tunngasut/napparsimanermik pissuteqartut pissutigalugit ilinniarninni kinguaattooraluarlutit.

Immersugassaq uani immersussavat uunga studieadm@uni.gl nassiutassat, tassunga ilanngutissavatit nakorsamit allagartaq aamma nammineq allatat tassani sooq qinnuteqaateqarnerlutit naatsumik nassuiaatigissavat.

Ilinniarnerit aallartikkukku piumasaqaataavoq nammineq angallattakkamik qarasaasiaqarnissat. Taanna illit ilinniarnerit tamakkerlugu sulianut atugassatut isigissavat soorunami atuartitsinernut nassartassavat aamma soraarummeernernut.

Atuakkanik, atuagassianik il.il. ujarlissaguit atuagaateqarfimmi PC-qarpoq sisamanik atorneqarsinnaasunik. Taakkua atorlugit atuagaateqarfimmi base ujarlerfigisinnaavat aamma illit ilinniarninnut isumalluutissanik allanik nassarsinnaavutit.

Tamatuma saniatigut inimik allannermut atugassamik peqarpoq PC-qarluni atorsinnaasassinnik assersuutigalugu nammineq PC-t qimattoorsimagukku.

Pimmatiginninneq kikkunnulluunniit ajoqutaasarpoq.

Pimmatigineqarneq atukkatigut annertuumik artukkiisarpoq, pimmatigineqarsimasullu timikkut eqqarsartaatsikkullu imaannaanngitsunik ersiuteqalersinnaasarput.

Taamatuttaaq avatangiisit pimmatiginninnermik akuersaarfiusut sullivimmi avatangiisinik kikkunnut tamanut nuanniillisitsisinnaapput - aamma pimmatigineqanngitsunut ajorsaarneqanngitsunullu.

Pimmatigineqarneq aalajangersimaqqissaartumik allaatigineqarsinnaanngilaq, matumali ataatungaani pissusilersornerit iliuutsillu pimmatiginninnertut misigineqarsinnaasut allaatigineqarput.

Inummik malersuinerit:

• Oqaatissuaassutinik siaruarterineq.
• Inummik (assersuutigalugu taassuma ileqqui tunuliaqutaalu pillugit) taassumaluunniit isumaa inuuneraluunniit pillugu ajuallatsitsineq, nikassaaneq quiassuaatiginninnerluunniit.
• Nilliaffigineqarneq, akerartorneqarneq, saapiloorneqarneq kamariataarfigineqarnerluunniit (puuffigineqarnerluunniit).
• Kissaatiginngisamik iliorfigineqarneq qaninniarpaluttumik sioorasaarerpaluttumilluunniit.

Immikkoortitsineq:

• Ataatsimooqatigiinnit soqutigineqannginneq, ilaatinneqannginneq alarneqarnerluunniit.
• Allanut saaffiginnikkaluarluni tusaanngitsuusaarneqarneq akeqqersimaarfigineqarnerluunniit.
• Inimut ilinniaqatigisat isersimaarfiannut iseraanni oqaluttoqarunnaartarnera.
• Ilinniaqatigisanit aaqatigivallaanngisanit quiassuaatigineqarneq tusangiasaarneqartarnerluunniit.

Ilisimatusarfik pimmatiginnittarnernut akuersaanngilluinnarpoq.

Ilisimatusarfimmi aqutsisut pimmatiginnittoqarsimatillugu akisussaassuseqarlutik akuliunnissamut pisussaaffeqarput.

Pimmatiginninneq inoqatinik akaarinninnginnermut asissuinermullu ersiutaavoq.

Pimmatigineqartut imminut ataqqiunnaarlutillu naleqanngitsutut misigilersinnaapput.

Pimmatigineqartaruit ilinniarfinni immikkoortortami pisortamut ilinniartunilluunniit sullissivimmut saaffiginnigit.

Tassaavoq ilinniartunut ini tassani qasuersaartoqarsinnaavoq, nuannisaarluni, brætspil atorlugit unammiaarluni kaffisuataarluni/tiituataarluni imaluunniit nerrivimmi arsaararluni.

Pitarfik studenterrådimit Pitamit pilersinneqarpoq ilinniartut ataqatigiinnerunissaat aamma anersaartorfeqalaarnissamut periarfissaqarnissaat anguniarlugu.

Ilinniartut ilinniakkamut attuumassuteqartumik qaammammit ataatsimit sivisunerusumik praktikernerminni Ilinniagaqarnersiutit pillugit Namminersorlutik Oqartussat nalunaarutaat nr. 9, ulloq 19. juli 2017-imeersumi, § 42 naapertorlugu uku pisinnaatitaaffigaat: illoqarfimmit ilinniarfiusumit praktikerfissamut utimullu angalanermut akiliunneqarneq

• pisariaqartumik najugaqarnermut aningaasartuutinut tapiiffigineqarnissaq

Periarfissaq tamanna pillugu annertunerusumik paasisaqarniaruit ilinniakkami ingerlatanni immikkoortortami pisortaq attaveqarfigiuk, angalanermullu tunngasut il.il. pillugit uunga studieadm@uni.gl saaffiginnissaatit.

Ilinniartunut Siunnersuisarfimmi tarnip pissusaagut siunnersuineq katsorsaanerlu neqeroorutaapput.

Atuaruk.

Ilisimatusarfiup eqqaani kujammut samminerani quimi pujortartarfimmi taamaallaat pujortartoqaqqusaavoq.

Tassunga anillassaatit inimi allermi atisaajartarfik aqqutigalugu.

Qitornanut tapisiaqarnissamut periarfissaqarputit illit nammineq qitornannik imaluunniit qitornavissiannik pilersuisussatut pisussaaffeqaruit.

Qitornamut ataatsimut qaammammut tapisiaq 1.023 kr. tunniunneqartarpoq.

Qitornamut tapisiaqarnissamut qinnuteqarfissaq immersugassaq uaniippoq.

Ved studierelevante praktikophold over én måneds varighed, har studerende, ifølge § 42 i Selvstyrets bekendtgørelse nr. 9 af 19. juli 2017 om uddannelsesstøtte, ret til:

• en frirejse fra uddannelsesbyen til praktikstedet og retur,
• tilskud til nødvendige opholdsudgifter.

Du kan søge om refundering af opholdsudgifter via denne blanket: Ansøgning om refusion af nødvendige opholdsudgifter, jf. § 42.

• Husk at vedhæfte faktura for huslejen.

Hvis du vil vide mere om denne mulighed skal du kontakte afdelingslederen for din uddannelse og for de praktiske ting rejser mm. ret da henvendelse til studieadm@uni.gl.

Ukioq atuarfiusoq semesterinut marlunnut avinneqarpoq.

Ukiakkut semesteri tassaavoq 1. september juullimi sulinngiffeqarnerup tungaanut.

Januari tassaavoq ilinniakkani amerlanerni soraarummeerfiusartoq.

Upernaakkut semesteri tassaavoq 1. februar aasaanerani sulinngiffiup tungaanut.

Juli aamma august qaammatit sulinngiffeqarfiupput taamaallaat ilinniartitsinermik ilisimatusarfik pinnani, taanna augustip qeqqani aallartittarpoq.

Quleriit pingajuanni ilisiveqarpoq ilinniakkani assigiinngitsuni semesterikkaartumik atuakkanik atugassanik imaqartumik.

Atuakkat atuagassatut imaluunniit kopiigassatut atugassiarineqarput, kisianni ilisivimmit peeqqusaanngillat (soorlu angerlaallugit imaluunniit illumi quleriinnut allanut ingerlallugit) tassami ilinniartunut tamanut atorneqarsinnaassammata.

Atuakkat semesterimut ilitsivimmi amigaataappata taava ilinniartooqatitit aperikkit atuakkamik tigummiaqarnersut.

Sikkilip Ilisimatusarfiup eqqaani aamma iluani inissinnissaanut periarfissaqarpoq.

Illup iluani sikkilinut inissiisarfik ini atisanut nivinngaasarfiup eqqaaniippoq.

Ilisimatusarfimmi siulersuisut nutaat 25. august 2020 inissitsitserput - tassani ilaasortaapput avataaneersut arfinillit ilisimatusarfimmeersut tallimat.

Siulittaasoq tassaavoq Suzanne Møller.

Siulersuisut pillugit immikkuualuttut amerlanerit atuarneqarsinnaapput uani.

Download.

Ilinniartoq angusinissami tungaanut pingasoriarluni soraarummeersinnaatitaavoq

Naliginnaasumik uunga innersuussisoqassaaq: Ilisimatusarfimmi ilinniagaqarnerit soraarummeertarnerillu pillugit Namminersornerullutik Oqartussat nalunaarutaat nr. 27, 1. september 1995-imeersoq. 

Atuartitsinernut illit malitannut automatiskiusumik soraarummeernissamut nalunaarutigineqassaatit. Soraarummeernissaq wiseflowikkut pilersikkaangatsigu paasissutissat atuaqaatigiinnit pissarsiarisarpavut. Periarfissaqarputit soraarummeernermut peqataanissavit taamaatinnissaanut, tamanna pissaaq kingusinnerpaamik soraarummeerfissatut pilersaarutaasoq ullunik 14-inik sioqqullugu. Uunga allassaatit: eksamenskontor@uni.gl.

Soraarummeeqqinnissamut taamaatiinnarnissaq soraarummeernissamut ullut 14-it sioqqullugit nalunaarutigineqassaaq . Kingusinaartumik peqataannginnissamut nalunaaruteqarneq  soraarummeernermut peqataasimanertut naleqarpoq. Tamannali atuutsinneqassanngilaq ilinniartup napparsimasimanini imaluunniit ilaqutariit qaniginerpaasat ilaasa napparsimanera uppernarsaammik tunniussaqarnikkut uppernarsarsinnaappagu.

Soraarummeernissamut pilersaarut ukiuunerani soraarummeernissamut tunngasoq kingusinnerpaamik 1. novembari tamanut saqqummiunneqartarpoq, kiisalu aasaanerani soraarummeernissamut kingusinnerpaamik 1. apriili Wiseflowimi saqqummiunneqartarput (paasissutissat kinguliani takuneqarsinnaapput).

Soraarummeeqqinnissamut maleruagassat

Ilinniartoq soraarummeernermut peqataasimanngikkuni imaluunniit soraarummeerneq pisarnermisut ingerlanneqartartoq angusiffigisimanngikkuniuk, soraarummeeqqinnissamut allatsinnissaminut periarfissaqarpoq.

Soraarummeeqqissaguit taava una immersugassaq onlinemiittoq immersorlugu peqataanissat nalunaarutigissavat: kingusinnerpaamik 15. marts, 31. juli kiisalu 15. november.

Soraarummeeqqinnissaq pissaaq faagimi pineqartumi soraarummeerneq tulleq pisarnermisut ingerlanneqalerpat. Tamanna aatsaat pisinnaavoq soraarummeeqqinnissaq qaammatit tulliuttut 12-it iluanni ingerlanneqassappat. Tamanna pisinnaanngippat soraarummeeqqinnissamut piffissarititaasup tulliuttup ingerlanerani ingerlanneqassaaq, imaluunniit ilinniartoq ilinniakkap ingerlanerani pilersaarutit malillugit malinnaasinnaasariaqassapput, soraarummeeqqinnissaq ullut naliginnaasumik soraarummeerfigineqartartut avataatigut ingerlanneqarsinnaavoq. (Tamanna pitillugu qulaani piffissaliussat allassimasut ilinniartumut atuutissanngillat).

Soraarummeeqqinnissamut taamaatiinnarnissaq soraarummeernissamut ullut 14-it sioqqullugit nalunaarutigineqassaaq. Ilinniartoq piffissaq eqqorlugu taamaatiinnarnissaminut nalunaarsimanngikkuni soraarummeerneq misiliinertut nalunaarsorneqassaaq. Tamannali atuutsinneqassanngilaq ilinniartup napparsimasimanini imaluunniit ilaqutariit qaniginerpaasat ilaasa napparsimanera uppernarsaammik tunniussaqarnikkut uppernarsarsinnaappagu.

Soraarummeeqqinnerit pingasut ingerlanneqareerpata

Ilinniarnerup aaqqissuussaanera (studieordning) atuuttoq malillugu ilinniartup holdinut soraarummeerfissanullu allatsissinnaanini annaassavaa faagi pinngitsoorani ingerlanneqartussaq pingajussaaneerluni angusiffigisimanngikkuniuk. Tamatuma kingorna ilinniartoq ilinniarfimminiik anisitaassaaq.

Immikkut ittumik pisoqartillugu Ilisimatusarfik sisamassaanik soraarummeernissamut akuersisinnaavoq

Ilinniartoq sisamassaanik soraarummeernissaminut immikkut ittumik qinnuteqassaguni immersugassaq una immersorlugu qinnuteqaasiussaaq. Allagaq pingajussaaneerluni soraarummeereernerup kingorna nassiunneqassaaq, kingusinnerpaamik ullut arfineq-marluk qaangiutsinnagit. Qinnuteqaat uunga nassiunneqassaaq eksamenskontor@uni.gl.  

Immikkoortortaqarfimmi pisortap inassuteqarnerasigut rektori inaarutaasumik aalajangissaaq ilumut sisamassaanik soraarummeernissaq akuersissutigineqarsinnaanersoq.

Napparsimasimalluni soraarummeernermut maleruagassat

Napparsimasimalluni soraarummeerneq ingerlanneqarsinnaavoq ilinniartup soraarummeernerup nalaani napparsimasimanini uppernarsarsinnaappagu. Napparsimasimaneq pissutigalugu immikkut soraarummeernissaq taamaallaat akuerineqarsinnaavoq soraarummeertussaq:

1) soraarummeerfissamini napparsimasutut nalunaarutigineqarpat, 2) soraarummeernerup nalaani napparsimalerpat, 3) napparsimanini pillugu soraarummeerianngitsoorpat, imaluunniit 4) nammineq napparsimanermi saniatigut immikkut ivissumik uppernarsarneqarsinnaasumik pissuteqarluni soraarummeerianngitsoorpat.

Napparsimanermut uppernarsaat uunga nassiunneqassaaq eksamenskontor@uni.gl - kingusinnerpaamik soraarummeernerup kingorna ulluinnaat sisamat qaangiutsinnagit.

Napparsimasimalluni soraarummeernissaq peqqissisimanerup nalunaarutigineqarnerata kingorna pissaaq. Immikkoortortaqarfimmi pisortamit aammalu ilinniartumit isumaqatigiissutigineqassaaq qaqagu pissanersoq. Ilinniartut arlaqartut napparsimanerup kingorna soraarummeerneq ingerlatissappassuk, soraarummeerneq ataatsikkut ingerlanneqassaaq.

Napparsimasimalluni soraarummeerneq kingusinnerpaamik qaammatit 12-it tulliuttut iluanni ingerlanneqassaaq.

Illit pisinnaatitaavutit soraarummeernerpit nalilerneqarnera, soraarummeernermi ingerlaneq imaluunniit soraarummeernermut tunngaviusut pillugit naammagittaalliorsinnaanermut.

Oqaluttariarsornermi aamma allattariarsornermi soraarummeernerit naammagittaalliutigisinnaavatit.

Taamaattorli iluaqutaassaaq illit ilinniartitsisut attaveqarfigeqqaarukku pisortatigoortumik naammagittaalliornissat sioqqullugu.

Ilinniartitsisup naliliineq imaluunniit soraarummeernissap tungaanut ingerlasimaneq nalilissallugu tunngavilersuisinnaasariaqarpoq.

Soraarummeerneq pillugu naammagittaalliorneq immikkoortunut pingaarnernut sisamanut agguarneqarsinnaapput.

• Apeqqutit inatsisinut tunngasut – pissutsit Naalakkersuisunit inatsisikkut aalajangersarneqarsimasut.
• Soraarummeertitsinermi tunngaviusut (apeqqutit, suliakkiissutit, ilitsersuineq il.il.).
• Soraarummeernerup ingerlanera.
• Naliliineq (karakteri).

Pingaaruteqarpoq naammagittaalliutinni erseqqissumik paasissutissiissutiginissaa, pissutsit sisamaasut akornanni sorleq naammagittaalliuutiginerlugu.

Nalorniguit pissutsit taakkua arlaat sorleq pinerlugu, taava nangaassuteqarnak Ilinniarneq Sullissineq attaveqarfigisinnaavat.

Soraarummeernermi naliliineq naammagittaalliutiginiarukku, taava tamanna allakkatigut Ilinniarneq Sullissinermut ingerlatinneqassaaq, nalililiineq tigoreerukku sapaatit akunnerisa sisamat ingerlaneranni.

Naammagittaalliuuteqarneq allaganngorlugu uunga studieadm@uni.gl.

Oqaatsit allat atorlugit soraarummeernissamut qinnuteqarnermi periuseq.

Oqaatsit allat atorlugit soraarummeernissamut qinnuteqarnissamut periarfissaqarputit Ilisimatusarfimmi ilinniagaqarnerit soraarummeertarnerillu pillugit Namminersornerullutik Oqartussat nalunaarutaat nr. 27, 1. september 1995-imeersoq §25 tunngavigalugu.

Kalaallisut danskisulluunniit soraarummeerniaruit tunngavilersukkamik allagaqarlutit qinnuteqassaatit uungalu nassiullugu eksamenskontor@uni.gl, soraarummeersitsisussat allattorsimaffiata tamanut saqqummiunneqarnerannit kingusinnerpaamik ullut arfineq-marluk kingorna. (Tassa 8. november immaqaluunniit 8. april semesteri sorliunersoq apeqqutaalluni).

Tuluit oqaasii atorlugit soraarummeerniaruit tunngavilersukkamik allagaqarlutit qinnuteqassaatit uungalu nassiullugu eksamenskontor@uni.gl. Soraarummeernissamut allatsinniariaruit qinnuteqassaatit.

Kingusinnerpaamik 30. april.

Soraarummeeqqinnermi oqaatsit allat atorlugit soraarummeernissamut qinnuteqarfissanut killiusut aaku: 15. marts, 31. juli aamma 15. november.

Ilinniakkat soraarummeernerillu pillugit nalunaarut uani takusinnaavat.

Soraarummeernermi uukapaatitsinermut ilaapput peqquserlulluni allanngortitsineq, allat allaaserereersimasaannik assiliineq, nipangiussiinnarneq, soorlu assersuutigalugit paasissutissanik pissarsiffinnik ilanngussinnginneq imaluunniit allatut pineqartup suliai imaluunniit angusai pillugit puupassaarineq.

Ilinniartooqatigisap uukapaatitsineranik ikiuineq maleruaqqusanut ilaatinneqarpoq.

Uukapaatitsiniarluni misiliineq uukapaatitsinertut piviusunngortinneqarsimasutut suliarineqassapput.

Soraarummeernermi uukapaatitsinermik pasitsaassaqarneq soraarummeertitsisumut aamma/imaluunniit censorimut nalunaarutigineqassapput, tamatuma kingornatigut ilinniartoq tusarniaaffigineqassaaq aamma immikkoortortaqarfimmi aqutsisoq peqataatinneqalissalluni.

Soraarummeernermi uukapaatitsineq paasineqarpat aqutsisoq akisussaasuusoq (taanna tassaagajuttarpoq immikkoortortaqarfimmi aqutsisoq) aalajangiissaaq ilinniartumut qanoq ittumik kinguneqartitsinissaq pillugu.

Ilinniarnivit allartinnerani studiekortimik tunineqassaatit taanna Ilisimatusarfimmi ilinniakkamik ingerlatsisutut uppernarsaatitut atussavat.

Ilinniarneq Sullissinerup sapaatit akunnerani aallartiffiusumik assilineqarnissat isumagissavaat aamma allagartaq sapinngisamik piaartumik piareersimaneqassaaq.

Allagartaq atuagaateqarfimmi atuakkanik atorniarnermi atorsinnaavat imaluunniit pisiniarfinni il.il. ilinniartunut akikillisaasartuni atorsinnaavat.

Innersuussutigineqarpoq uffarnermut atortut, unernut tarnutit, cremet assigisaallu tipigissaatitallit tipigissaatillu atorneqannginnissaat, ilinniartut tipigissaatitalinnut sapigallit eqqarsaatigalugit.

Tipigissaatinik sapigaqarneq pillugu ilinniartoqatit oqaloqatiginissaat aqqutissaavoq.

Innersuussutigaarput atorsimasatit atoreerukkit kusarnartumik inisseqqittassagitit - apeqqutaatinnagu sumiissimanerit.

Universiteterput kusanartuuvoq aamma eqqiluitsuulluni aamma taamaattuaannarnissaa anguniassavarput.

Pissutsit "nalinginnaatillugit" aamma piffissap ammasarfiup nalaani Uni iserfigineqarsinnaavoq studiekort atornagu.

Matu isertarfik paarnaarsimappat isersinnaavutit studiekort atorlugu taanna kortlæserimut matup talerpiata tungaaniittumut scannertissavat.

Unnukkut aamma sapaatit akunnerata naanerani illumut isernissat pilersaarutigigukku taava unnukkut passimik peqassaatit.

Ataaniittoq takuuk.

Periarfissaqarputit ukioq ataaseq angullugu ilinniarninnit uninngallarnissamut qinnuteqaateqarnissamut.

Unikkallarnissamut qinnuteqaateqarnissamut immersugassaq immersoruk uungalu nassiullugu studieadm@uni.gl.

NB eqqaamallugu ilinniarnerit ingerlateqqissallugu uternissat qaammatinik pingasunik sioqqullugu nalunaaruteqassagavit.

Immersugassaq aasinnaavat uani.

Eqqarsaatigigukku ilinniarnerit unitsinniarlugu taava uagutsinnit ilinnut inassutigineqassaaq studievejlederi, studiechef imaluunniit illit ilinniarfinni immikkoortortamut pisortaq oqaloqatigissagit.

Immaqa oqaloqatigiinneq ilinnut iluaqutaasinnaavoq kissaatigisannik eqqarsaqqinnissamut.

Illilli tamanna aalajangiutivissimagukku, taava atuarunnaarnermut immersugassamik taaneqartartoq immersussavat, taanna uani nassaarisinnaavat.

Nalinginnaasumik ammasarfiit avataanni aammattaaq sapaatit akunnerata naanerani Ilisimatusarfimmiikkusukkuit, taava "unnukkut passimik" taaneqartartumik peqassaatit.

Taanna saaffiginnittarfimmi sulisup suliarissavaa.

Taanna pigaartut apeqqutigippassuk takutinneqartussaavoq.

Netværk ledningeqanngitsoq toqqaruk ILI mobil.

Atuisutut atit aamma kode isissutissaq atoruk.

Ajutoorpat misileqqiguk una: www.tele.gl imaluunniit www.dmi.dk aqqutigalugu.

Ilaannikkut aammattaaq iluaqutaasinnaavoq wifi attaveeruteriarlugu misileqqillugu.

Nalorniguit IT-mik ikiusartut attaveqarfigikkit ikiuut@uni.gl.

Ilisimatusarfimmi soraarummeernermut programi taaguutilik wiseflow atorneqarpoq oqaluttariarsornermi aamma allattariarsornermi soraarummeernernut tamanut, taamatuttaaq suliakkiissutinut tunniussassanut nalilerneqartussanut.

Uguuna isissaatit: www.wiseflow.net -> login -> Ilisimatusarfik -> Edugain -> unimailit allassavat + isertaatit.