Uppernarsarneqarsimasunik ilisimalikkatigut teologiimi aamma ooqattaarinertigut misilittakkallu tunngavigalugit oqaluffiit pillugit ilisimatuutut misissuinermi ilaatigut misissorneqartut tassaapput Kalaallit Nunaanni upperisat oqaluffeqarnerullu nalitsinni piviusumik isikkui aamma nalitsinni siunissamiluunniit qaninnerusumi teologiikkut, oqaluffeqarnikkut upperisarisatigullu unammillernartut piviusut. Taakkua assersuutigalugu tassaasinnaapput upperisatigut uppeqatigiit aamma anersaatigut isumaliortaatsit sammivii kiisalu taakkunani aallunneqartut, taakkualu akornanni nunap innuttaasuisa agguataarsimanerat aammattaaq upperisatigut imaluunniit isumaliortaatitigut peqatigiinnerit qanoq imminnut attuumassuteqarnerat.

Ilisimatuutut misissuininni immikkut soqutigisakka aallussakkalu tassaapput ilagiit aamma oqaluffeqarnikkut sunniutit maani nunamiissimasut suliluunniit nunamiittut.

Kisianni Kalaallit Nunaanni Ilagiit, nunami innuttaasut 95%-iisa ilaasortaaffigisaat, misissuinermi immikkut soqutigineqarlutillu qitiutinneqarput. Ilagiit maannakkut isikkuat, periaasiat aamma nunasiaataasimanerup kingorna kinaassutsiminnik, periaatsinik Kalaallit Nunaannilu innuttaasut akornanni inissisimaffimminnik siunissami qaninnermi nassaarniarnerannut misissuineq tunngatinneqarpoq.

Gimmi Olsen ph.d.-nngorniarnermini pitsaassuseq aallaavigalugu misissueriaaseq ilusilersugaq atorlugu maannakkorpiaq ilisimatuutut misissuivoq, inuiaqatigiillu atugarissaarnissaannut tunngatillugu Kalaallit Nunaanni Ilagiit isumaginninnikkut ingerlassaqartutut atuuffiat misissuinermi qanimut misissorneqarpoq. Inuiaqatigiit akornanni inooqatigiinni ajornartorsiutit nuimasut pillugit ilagiit taakkualu pingaarnertut sinniisui qanorpiaq isumaqarnersut imaluunniit qanoq inissisimaffeqarusunnersut kiisalu tamassumunnga atatillugu avataaniit ilagiinnut qanoq naatsorsuuteqartoqarnersoq immikkut sammineqarput.