Apeqqarissaarneq

Gitte, ilisimatuutut qanoq aallartippit?

”Nalaatsornerinnaagunarpoq, ilisimatuunngornera.”

”Ilinniarnerma nalaani, ilinniaqatima ilaat nunani allani ilinniareerluni tikippoq .. tassanilu naapissimavai ph.d.’mik ilinniartut. Oqarfigivaanga: ”Gitte, ph.d.’mik ilinniagaqassaagut – taakku sapinngippata uagut sapissanngilarput”. Kandidatitut ilinniarnera naammassigakku – misigisimavunga, allanneq atuarnerlu suli soqutigilluinnarlugit .. taamaattumik pissusissamisoorpoq ph.d.’mut ingerlaqqissallunga.”

”Taamanimiillu ilisimatusarnermut nangeqqissimallugu – nuannarilluinnarparalu!”

Maannakkut suna ilisimatusaatigaajuk?

”Maannakkut ilisimatusarneq peqataaffigivara Montana State University peqatigalugu, tuluttut taaguuteqartoq ”Population Dynamics in Greenland” - ilisimatusarnerpullu ingerlanneqarpoq nunaqarfimmi Kullorsuarmi.”

”Montana State ilisimatusartarpoq peqqinnissaq, atoqatigiinneq avatangiisillu pillugit .. uanga qitiutillugit sammivakka eqqarleriinneq, ilaqutariilerneq kulturilu Kullorsuarmi. Piffissami qanittumi Kullorsuarmukaqqissaanga ilisimatusarninnut atatillugu tunngavissannik katersinissaq siunertaralugu. Qilanaaqaangalu.”

”Ph.d.’mik illersukkannut arlalitsigut assigiissuteqarpoq, illoqarfimmi eqqarleriinneq pillugu. Taamaalilluni malittariissuteqarpoq maannakkut ilisimatusaatigisara.”

Ilisimatusarnissamut suna ilinnut kajumilersitsisarpa?

”Ilisimatusaatigisama iluani pissanganartoqartuaannarlunilu apeqqutinik akissutissartaqanngitsunik peqartuaannarpoq - aamma misissuiffigineqanngitsoqartuarpoq, utaqqiinnartunik misissuiffigineqarnissaminnik. Tamannalu assut pissanganarpoq!”

”Aap aamma .. ilaatigut ajorsitsaarneqalaartarpugut .. assersuutigalugu inuit oqaaseqaraangata, ilisimatusaatigineqarsimanngitsunik tunuliaqutalinnik. Taamaattoqartillugu pissutsit qanoq ittuunerinik erseqqissaarusunneq kajumissuseqalersitsinera annertusiallattarpoq.”

Gitte - ilisimatusarnerit kalaallinut inuiaqatigiinnut sooq pingaaruteqarpa?

”Maannakkut ilisimatusaatigisara qiviariarutsigu - ”Population Dynamics in Greenland” - ilisimatusarnerpullu Kullorsuarmi .. uani peqataatinneqarlutillu akuutinneqarput nunaqarfimmi tamaanimiut (aamma Namminersorlutik Oqartussat peqqinnissaqarfillu) suleqatigineqarlutik apeqqutinik, paaserusutaannik. Taamaalilluni, nunaqarfimmi pineqartumi inuiaqatigiit atugaat piviusumik ilisimatusaatigineqarput – nunaqarfimmiullu ilisimatusaatitut suliaq pigiliussatut tiguaat.”

”Taamaalilluni nunaqarfik Kalaallillu Nunaat ilisimatusaatigineqartumit annertuumik pissarsipput. Ilisimatusartut uagut atorpaatigut, suliamik ilisimasalittut sulinitsinni .. kiisalu ilaqutariilerneq, peqqinnissaq, kinaassuseq assigisaalu pillugit inernerit innersuussinerillu ilisimatusarneq 2017’imi piareerluni saqqummiunneqarpat nunaqarfimmut atatillugu atorneqarsinnaavoq, kisianni aamma nalinginnaasumik Kalaallit Nunaanni inuuniarnikkut atugassarititaasut pitsanngorsarneqarnissaanut.”