GUX, Niuernermik Ilinniarfik il.il.

Ilinniartitaanerit pillugit isiginnaagassiat nutaat suliareqqammerpavut, Ilisimatusarfimmilu ilinniartut assigiinngitsunik sammivilinnik ilinniagallit taakkunani naapinneqarsinnaapput.

Ilinniartitaanerit pillugit isiginnaagassiat ilinniartunut nutaanut isumassarsiorfissatut sanaajupput - kisianni soorunami aamma kikkunnulluunniit ilinniartitaanerit neqeroorutivut pillugit annerusumik paasisaqarusuttunut.

Ilisimatusarfimmi ilinniakkat assigiinngitsorpassuit ilinniarsinnaavatit.

Ilisimatusarfik qaqugukkulluunniit pulaarneqarsinnaavoq soorlu maani ilinniartut qanoq atugaqarnerat paasisaqarfigerusukkaanni aammali iorsuaq takorannersoq takuniaraanni.

Atuartutut/ilinniartutut plaarneq

Illit ilinniartitsisuppillunniit Ilisimatusarfik pulaarusuppagu periarfissaqartuaannarpoq.

Pulaarnermi makku periarfissaapput:

• Bachelorinngorniartunik kandidatinngorniartunilluunniit naapitsineq, ilinniarnerillu imarisaannik paasiniaaffigalugit
• Universitetimi ilinniartuulluni qanoq innersoq ilinniartullu akornanniilluni inuuneq qanoq ittuunersoq tusagaqarfigalugit
• Ilinniartunik siunnersorti naapillugu paasiniaaffigalugu, soorlu ilinniartunngorniaraanni suut piumasaqaataanersut
• Illorsuarmi alutornartumi takornariarneq

Paasisaqarnerorusukkuit e-mailerfigiinnassavatsigut.

Kalaallit Nunaanni ukiut tamaasa novembarimi Ilinniartitaaneq pillugu Paasititsiniaalluni Angalanermik taaneqartartoq ingerlanneqartarpoq.

Ilinniartitaaneq pillugu paasititsiniaalluni angalanermi siunertarineqartoq tassaavoq nunatta sineriaani illoqarfinnut annerusunut angalanissaq - kalaallillu inuusuttaannut ilinniartitaanerup iluani periarfissarpassuit pillugit paasissutissiinissaq.

Ilisimatusarfik Ilinniartitaaneq pillugu Paasititsiniaalluni Angalanermi ukiut tamarluinnaasa soorunami peqataasarpoq.

Illit ilinniartitsisulluunniit Ilisimatusarfimmit pulaartoqarusukkuit/-suppat - soorunami tamanna aamma periarfissaavoq.

Ilinniarfiit pulaarnerani saqqummiinerput assersuutigalugu ukuninnga imaqarsinnaavoq:

• Ilinniarfivut pillugit paasissutissat (ilinniartunik ilitsersuisoq ilinniartullu peqatigalugit)
• Ilisimatusarfimmi ilinniartutut inuunerup - aamma ilinniartunut avatangiiseqartitsinitta - qanoq innerannik paasissutissat
• Ilinnialernissamut akuerisaanissamut piumasaqaatit, soraarummeernerit il.il. pillugit paasissutissat
• Allarpassuarnullu tunngasut ..

Illit ilinniartitsisulluunniit Ilisimatusarfimmit pulaartoqarusukkuit/-suppat - e-mailimik nassissiffigiinnarsinnaavatsigut.