Teknologii nammineerluni eqqarsarsinnaasoq (AI) Kalaallit Nunaanni

Teknologii nammineerluni eqqarsarsinnaasumut (AI-mut) atatillugu nunarsuaq tamakkerlugu annertuumik siuariartoqarnera takuarput.

Tamanna Kalaallit Nunaanni inuiaqatigiinnut sunniuteqarumaarlunilu annertuumik allannguuteqartitsiumaarpoq. Taamaammat allannguutit taakkua inuiaqatigiittut qanoq iseriartorfigineqarnissaat pillugu oqallinnissaq pingaaruteqarpoq.

Teknologii nammineerluni eqqarsarsinnaasumik atuinerup sunniutai malinnaasut aammattaaq tamassuminnga atuinerup nassataatut eqqorneqajassutsit pinngitsuuisinnaajunnaarnerullu oqallissutigineqarnissaat pingaaruteqarpoq.

Taamaammat Signe Ravn-Højgaardip teknologii nammineerluni eqqarsarsinnaasoq pillugu nassuiaalluni saqqummiussineq aallarnissavaa, aamma oqaatsit soorlu oqaatsit ilusaat, maskiinat ilinniartinneqarnerat aamma paasissutissanut isersinnaatitaaneq isumaat nassuiarlugillu teknologii nammineerluni eqqarsarsinnaasumut tunngatillugu oqallinnermi suut sammineqarnersut saqqummiutissavai.

Teknologii nammineq eqqarsarsinnaasumik Kalaallit Nunaanni atuisariaaseq ataaseq saqqummiinerup immikkoortuata aappaani qitiutinneqassaaq, tassaasoq: kalaallisuumit aamma kalaallisuumut nutserusiummik maskiinamik atuineq.

Tamassumani Beatrine Heilmannip aamma Tino Didriksenip teknologii nammineq eqqarsarsinnaasoq tunngavigalugu nutserusiummik maskiinamik atuinerup periarfissarititai aamma inuiaqatigiinnut iluaqutaasussanik oqaatsitsigut atortunik Oqaasileriffiup ineriartortitsinera eqqartussavaat.

Naggasiutitut teknologii nammineq eqqarsarsinnaasup inuiaqatigiinnut iluaqutaatinniarlugu politikkip tungaaniit qanoq qulakkeerneqarsinnaaneranut Beatrine Heilmannip, Signe Ravn-Højgaardip aamma Kalaallit Nunaanni Sulisitsisuneersup Christian Keldsenip tamarmik immikkut tapiliussissapput.

Saqqummiisussat

• Beatrine Heilmann Oqaasileriffimmi pisortaq.
• Tino Didriksen Oqaasileriffimmi qarasaasiami programminik ineriartortitsisuuvoq ilaatigullu kalaallisut nutserusiut maskiinap nutserut.gl-ip ineriartortinneqarnera isumagisaralugu.
• Signe Ravn-Højgaard Ilisimatusarfimmi ph.d.-nngorniaatigaluni adjunktiuvoq aamma 2022-2023-mi Nunat Avannarliit Ministeriisa Siunnersuisoqatigiiffiata teknologiimut tamallu oqartussaanerat pillugu isummersuisuanni ilaasortaasimavoq. Attaveqatigiinnermi ilisimatusartutut suliffeqarfissuit teknologii aqqutigalugu paasissutissiortut Kalaallit Nunaanni tamat oqartussaanerannut sunniuteqarnerat taassuma ilaatigut ilisimatusaatigaa.
• Christian Keldsen, Kalaallit Nunaanni Sulisitsisuni pisortaq, Kalaallit Nunaanni suliffeqarfiit inuussutissarsiuteqartullu kattuffiat.