Uumassusilerinermi SILA-mi bacheloritut ilinniagaq pillugu paasissutissiilluni ataatsimiisitsineq

Ilinniagaq qanorlu qinnuteqarnissat paasisaqarfiginerorusukkukku taava paasissutissiilluni ataatsimiisitsinernut aggersaavugut

Ilisimatusarfiup Uumassusilerinermi SILA-mi bachelori ilisaritippaa - ilinniagaq immikkorluinnaq ittoq maanna qinnuteqarfigisinnaasat.

Kalaallit Nunaanni pinngortitamut immikkut ittumik atassuteqarpugut, pinngortitarlu aningaasaqarnitsinnut, inuussutissatsinnut, kulturitsinnut aamma eqqarsartaatsikkut peqqissusitsinnut tunngaviuvoq. Immikkoortut taakkua tamarmik uumassusilerinermi SILA-mi bachelorimi ilaatinneqarput.

Pinngortitaleriffiup suleqatigineratigut Ilisimatusarfiup uumassusilerinermi ilinniagaq pilersissimavaa, ilinniakkamilu nunatsinni pinngortitaq kulturerpullu qitiutinneqarput - ukualu ilinniakkami ilaatigut aamma sammineqarput:

• Aavarneq aamma Kalaallit Nunaanni uumasunik pissuseqatigiinnik suliaqarnermik misilittagaqalerneq.
• Pinngortitami aamma laboratoriami uumassusilerinermi misissuinerit.
• Kalaallit Nunaanni suliffeqarnermut peqataalersinneqarneq.
• Uumassusilerinermi ilisimasanik ilikkagaqarneq aamma ingerlatitseqqiisarneq.

Qinnuteqarnissamut piffissaliussaq tassaavoq novembarip 1-at 2024, ilinniagarlu februaarip 1-ani 2025 aallartissaaq.

Ilinniagaq qanorlu qinnuteqarnissat paasisaqarfiginerorusukkukku taava paasissutissiilluni ataatsimiisitsinernut aggersaavugut - uanilu ingerlanneqassapput:

• Aggustip 21-ani 2024 nal. 16.00-imiit Ilisimatusarfiup eqqaani Pikialaarfimmi (illutaa qernertuuvoq).
• Aggustip 28-ani 2024 nal. 16.00-imiit internettikkut (internettikkut ataatsimiinnermi peqataarusukkuit Aviaja Lyberth Hauptmannimut mailernikkut allatsissaatit uunga alha@uni.gl imaluunniit Liv Larsenimut uunga livl@uni.gl - tamassuma kingorna ataatsimiinnissamut innersuussissummik pissarsissaatit).

Soqutiginnittut tamarmik peqataanissaminnut tikilluaqqusaangaarput.