Isumaginninnikkut ataatsimeersuarnerit II
Ilisimatusarfiup Issittumi Atugarissaarneq pillugu Ilisimatusarfia 'peqatigiinneq nukittooq' sammisaralugu Isumaginninnikkut Ataatsimeersuarnissamut II-mut aggersaavoq.
Ataatsimeersuarneq isumaginninnikkut ilisimatusarnermi ataatsimeersuarneruvoq sulinermi periutsit isumaginninnikkullu ilisimatusarnerup akornanni sunniivigeqatigiittarnernik nukittorsaasussaq.
Suliamut tunngasumik ataavartumik oqalliffeqartoqarnissaa sivisuumik amigaatigineqartarsimavoq, sulinermi periutsit isumaginninnikkullu ilisimatusarnerup akornanni ilisimasanik avitseqatigiiffiusartussamik.
Isumaginninnikkut Ataatsimeersuarnermi II-mi ilisimatusartut isumaginninnerullu iluani suliaqartut akornanni saqqummiussinerit suliamullu tunngasunik oqallinnerit sunniivigeqatigiittassapput.
Isumaginninnikkut Ataatsimeersuarnermi II-mi uani tulliattut ilusilersukkami ukiunilu aggersuni isumaginninnermut suliassaqarfik siammasinnerusumik sammineqartassaaq, tassani isumaginninnermut politikki, perorsaanermik ilinniutit, meeqqat inuusuttullu atugarissaarnissaat, inuit innarluutillit, utoqqaat atugarissaarnissaat kiisalu inuuniarnikkut ajornartorsiutit ukkatarineqartassallutik.
Isumaginninnikkut Ataatsimeersuarnermi II-mi aallaavigineqartoq tassaavoq Kalaallit Nunaanni isumaginninneq pillugu ilisimasanik kingullernik ingerlateqqiisarnerup nukittorsarneqarnissaa, isumaginninnermi ilisimatusarnikkut misissuinerit suliaqarnerullu akornanni ilisimasanik avitseqatigiittarnerup ataqatigiissutsillu nukittorsarneqarnissaat kiisalu nunat allat ilisimatusaataanniit suliakkullu periutaasa tungaanniit isiginninniarnissaq.
Peqataasut ukua pissarsiaqarfigissavaat
-
Isumaginninnermut suliassaqarfimmi suliakkut periutsit nutaajunerit tusagaqarfiginissaat
-
Isumaginninnermut suliassaqarfiup iluani ilisimatusarnikkut misissuinerit kingulliit tusagaqarfiginissaat
-
Suliassaqarfiup iluani ilisimasalinnik naapitsineq
-
Suliniutit kingulliit pillugit suliakkut periutsit ilisimatusarnikkullu misissuinerit iluanni qanoq ingerlaavartumik oqaloqatigiittoqartarnerata takunissaa
-
Nunatsinneersunik nunattalu avataaneersunik attaveqarfinnik pilersitsinissamut nukittorsaanissamillu periarfissinneqarneq
Inuiaqatigiinni atugarissaarnermut iluaqutaasussat tassaapput
- Nunatsinni isumaginninnikkut sulineq ukkatarineqassaaq
- Nunatsinneersunik nunanillu allaneersunik suliaqartunik suleqateqarnerup nukittorsarnissaanut periarfissinneqarneq
- Nunatsinni isumaginninnermik suliaqartut ilisimatusarnikkullu misissuisut avatangiisii nukittorsarneqassapput
- Isumaginninnermik suliaqartut ilisimatusartullu ataatsimoorlutik isumaginninnermut suliassaqarfimmi ajornartorsiutinik maanna pisunik ukkataqassapput, assersuutigalugu periutsit suliaqarnikkut sunniuteqartartut atornerisigut
- Isumaginninnerup iluani ilisimasanik kingullernik ilisaritinneqarneq kiisalu maannakkut suliniutaasunik nalilersuisoqarnera
Sullinniakkat tassaapput
- Isumaginninnerup iluani suliaqartut
- Suliniaqatigiiffinni naalakkersuisutiguunngitsuni (NGO-ni) sulisut
- Kommunini naalakkersuisoqarfinnilu sulisut
- Politikerit
- Ilisimatusartut
- Ilinniartut (inissat 15%-ii ilinniartunuupput)
Sammisat pingaarnerit saqqummiunneqarnerisigut ullut aallartinneqartassapput, tamassumalu kingorna suliamut tunngasunik saqqummiinerit eqqartueqatigiinnerillu sammiveqatigiissillugit ataatsimiinnerit ingerlanneqartassapput.
Inernissatut naatsorsuutigineqartut
Kalaallit Nunaanni isumaginninnermut suliassaqarfiup iluani ilisimasanik avitseqatigiinneq qajannaallisagaq. Immikkut ilinniagallit sulinermilu pissutsit akornanni nukittorsakkamik ilisimasaqalerneq. Suut iluaqutaasarnersut, siunissamut isigisumik isumaginninnikkut ataavartitsisussamik kinguneqartitsisinnaanissatsinnut ilisimasanik kingullernik pissarsineq. Isumaginninneq pillugu ilisimatusarnerup iliuuseqarnissamut sammiveqartumik qanoq isilluni periusinngortinneqarnissaannik naammassisaqarfiunissaanillu paasinninneq - taamaasilluni suliatigut aningaasatigullu isumalluutit angusassamik toraagaqarluni atorneqarsinnaalissapput.
- Isumaginninnermut suliassaqarfiup iluani sulinermi periutsit kingulliit pillugit tusagaqarneq
- Isumaginninnermut suliassaqarfiup iluani ilisimatusarnikkut misissuinerit kingulliit tusagaqarfiginissaat
- Suliassaqarfiup iluani ilisimasalinnik naapitsineq
- Suliniutit kingulliit pillugit suliakkut periutsit ilisimatusarnikkullu misissuinerit pillugit ingerlaavartumik oqaloqatigiittoqartalissaaq
- Nunatsinni nunanilu allani attaveqarfinnik pilersitsisoqassaaq
- Nunatsinni isumaginninnermik suliaqarneq qitiutinneqassaaq
- Nunatsinneersunik nunattalu avataaneersunik suliaqartunik attaveqarfinnik pilersitsinissamut nukittorsaanissamillu periarfissinneqarneq
- Nunatsinnut ussagarnerulersitsillunilu nunatsinni isumaginninnermik ukkatarilersitsineq
- Nunatsinni isumaginninnermik suliaqartut ilisimatusarnikkullu misissuinermi avatangiisit nukittorsassavai
- Nunatsinni isumaginninnikkut pisariaqartinneqartunut tunngatillugu oqalugiartunik workshoppertitsinermilu peqataasunik naapitsineq
- Isumaginninnermut suliassaqarfimmi suliaqarneq nukittorsassavaa
Inussiarnersumik inuulluaqqusilluta;
Ilisimatusarfiup issittumi atugarissaarneq pillugu ilisimatusarfia
Ataatsimeersuarnermut aningaasaliisut
NunaFondenip Isumaginninnikkut Ataatsimeersuarneq II aningaasaliiffigimmagu ICAV-imit qutsavigaarput.
FACEBOOK
LINKEDIN
Assiliuk - linki
