SafeHarbour Greenland pillugu workshoppertitsineq iluatsilluartoq: Ilaqutariit nukittorsarnissaat angerlarsimaffiullu avataanut inissiisarnerit ikilisinneqarnissaat

Tallimanngorneq februaarip 14-iani 2025 SafeHarbour Greenland pillugu isumassarsiorluarfiusumik workshoppertitsisoqarpoq - suliniummi anguniagartuumi tassani Kalaallit Nunaanni angerlarsimaffiup avataanut meeqqanik inissiisarnerup annikillisarneqarnissaa anguniarneqarpoq.

Nunat Avannarliit akornanni Kalaallit Nunaanni amerlanerpaanik angerlarsimaffiup avataanut inissiisoqarfiusarnerani nunarput unammilligassaqangaatsiarpoq, tamanna meeqqat ilaqutariillu atugarissaarnissaannut sunniuteqaannarneq ajorpoq, aammattaarli inuiaqatigiinnut aningaasaqarniarnikkut nammatassiisarpoq.

Piviusup tamatuma allannguivigineqarnissaa SafeHarbour Greenland-ip siunertaraa, meeqqallu angerlarsimaffimminni toqqissisimaffiusuni aalajaatsunilu peroriartorsinnaanissammata ilaqutariit aamma najugaqarfinni inuiaqatigiit nukittorsaavigineratigut taama iliussapput.

Workshoppertitsinermi peqataasut tassaapput angerlarsimaffiup avataanut siornatigut inissinneqarnikuusimasut, suliamik ilinniarsimasut aamma ilisimatuutut misissuisut, taakkua suliniummik aallarniillutik suliaqarnerminnut Arctic Research Bursary-mit tapiiffigineqarput.

Ilisimasanik, misilittakkanik isumassarsianillu avitseqatigiittoqarpoq, taakkualu tamarmik siunissaq ungasinnerusoq eqqarsaatigalugu pisariaqanngitsunik angerlarsimaffiup avataanut inissiisarneq pinaveersaartinniarlugu, ataavartussamik aaqqiissutissamik taperseeqataassapput.

Suliniut ikorfartorneqangaatsiarpoq, meeqqanullu, ilaqutariinnut inuiaqatigiinnullu ataatsimut asigalugit tigussaasunik aaqqiissutissiortoqarnissaanut pingaarutilimmik workshoppertitsineq siullerpaamik alloriartitsivoq.

Nittartakkatsinni SafeHarbour Greenland pillugu atuarnerusinnaavutit.