Misissuinerup takutippaa issittumi avatangiisit allanngoriartorneranni qimmit nannunniarnermi pingaaruteqarluinnartuusut

Arctic Science-imi saqqummersinneqartumi, A Study of Nanorriutit - Polar Bear Hunting Dogs in Avanersuaq-mi nanorriutit - nannunniarneq siunertaralugu immikkut sungiusarneqarsimasut - Avanersuarmi inuiaqatigiinni pingaaruteqartorujussuusut ersersinneqarpoq.

Nanorriutit qimuttussaannaanngillat piniarnermi iluaqutissatut atorluarneqartartut, kisiannili nanorriutit piniartut piniarneranni iluaqutaanermikkut pinngitsoorneqarsinnaanngillat, ukiunilu hunnorujukkaani issittumi avatangiisini peqqarniitsuni piniartut napatissinnaasimavaat.

Maannakkut silap pissusiata allanngoriartorneranik, inoqarfiit annerit nutserfigineqarnerulernerannik inuillu inooriaasiisa allanngoriartornerannik piniariaaseq taanna ulorianartorsiortinneqarpoq.

Misissuineq Avanersuarmi kulturikkut ilisimasalinnik aqqaneq pingasunik Savissivimmeersunik Qaanaameersunillu apersuinernik tunngaveqarpoq.

Tassani piniartut, qimmit kiisalu pinngortitap ataqatigiinnerat ersersinneqarpoq, nannunniarnerullu ileqqut piniariaatsillu qanoq allanngoriartornersut takutinneqarpoq. Annikinnerusumik sikusarnerata piniarnermilu periarfissat annikillinerisa piniarnermik ingerlatitseqqittussat inuusuttut piniarnermik nappateqarusuttut ikiliartorput.

"Qimmit piniarnerlu taamaallaat pineqanngillat - kulturikkut kingornussatta immikkuullarissup ersersinneqarnissaa ingerlateqqinnissaalu pineqarpoq, tassaniipporlu inuit pinngortitamut atassuteqarnerat," Manumina Lund Jensen, misissuinermi allaatiginnittoq oqarpoq. "Nanorriutit ukiuni hunnorujukkaani piniartunut inuuniarnermi periarfissanik pilersitsisarput, aammalu piniarnermi ileqqutoqqat pigiinnarnissaannut pingaaruteqarlutik. Silap pissusiata allanngoriartornerata nassatarisaanik piniarnermi ileqqutoqqat annaaneqarsinnaapput, aammalu silaannarmi peqqarniitsumi inuusoqarsinnaaneranut ilisimasaqarneq tammariartulersinnaalluni."

Nunarsuarmi inuiaat kulturiannik piujuartitsiniarnermik, silap pissusiata allanngoriartorneranik aammalu kulturikkut kingornussanik annaaneqartartunik misissuineq saqqummiussaqarpoq.

Kulturitta annaaneqannginnissaa pingaaruteqartoq ersersinneqarpoq, aammalu ileqqutoqqat nutaanerusumik nalilersorneqarnissaat siunissami qanoq ataavartitsinissamut iluaqutaasinnaanersut saqqummiunneqarpoq.

Assiliisoq: Josefin Kuschela

Arctic Science-imi allaaserisaq tamaat atuaruk - misissuineq ResearchGate-mi aamma atuarneqarsinnaavoq.

Paasissutissanik annertunerusunik piniarnermi imaluunniit tusagassiuutinit apeqquteqarnermi attavigineqarsinnaavoq: Manumina Lund Jensen, maln@uni.gl & +299 48 52 00.