The Northern Review-imi kalaallisut allaaserisaq

Silke Reeploegip allaaserisaa The Northern Review-imi saqqummersinneqaqqammerpoq - allaaserisaalu tassaavoq atuagassiami tassani nunap inoqqaavisa oqaasii atorlugit saqqummersinneqartoq siullerpaaq.

Allaaserisami ima qulequtalimmi "Issittumi paasinnittaatsinik misissuineq: Oqaluttuarisaaneq pillugu ilinniartitsineq aqqutigalugu nunasiaataanerup oqaluttuarisaanerani pullaviit apeqquserlugit" ilisimasat oqaluttuarisaanerlu nunat killerneersuunngitsut ilisimatusarnerup ilinniartitaanerullu silarsuaanni immikkoortinneqakkajuttarnerisa aaqqiiviginissaanut oqaluttuarisaaneq pillugu ilinniartitsineq qanoq iluaqutaasinnaanersoq misissorneqarpoq.

Issittumi nunap inoqqaavisa isiginnittariaasiat qitiutillugu piujuartitsisumik ineriartortitsinermut UNESCO-p sinaakkusiaa tunngavigalugu nutaatut periuseqarnissaq allaaserisami siunnersuutigineqarpoq. Nunap inoqqaavinit ilisimatusartunit ilikkagaqarnissap qanoq pingaaruteqartiginera allaaserisami ersersinneqarpoq, taamaasilluni taakkua suliaasa ilisimasanut katersuivinnut assigiinngitsunut naapertuilluarnerusumik ilanngunneqarnissaat qulakkeerneqarsinnaalissaaq.