Ilinniartunut siunnersortip ilinniartut ikiortarpai

Ilisimatusarfimmi ilinniartut (aamma ilinnialertussat) ilinniartunut siunnersortitsinnit Augustine Berthelsenimit sutigut tamatigut ikiorneqarsinnaallutillu siunnersorneqarsinnaapput, ilinniartunut siunnersorterput suliatigut inuttullu unammillernartunut tunngasunik ikiuinissaminut piareersimavoq.

Augustine ilaatigut ukuninnga tunngasunik aqqutissiuisinnaavoq:

• Ilinniagaqarnersiutinut iliuusissanullu tunngasut: Aningaasatigut ikiorserneqarnissamut, kollegieni ineqarnermut, angalanernut aamma ilinniarnerup nalaani ilaquttanik nassarnermut tunngasunik ikiorneqarit.
• Ilinniarnerup ingerlarnga & suliffissatut periarfissat: Ilinniakkat imarisaat, sannaat aamma siunissami suliffissatut periarfissat pillugit paasissutissat.
• Ilinniartunut piumasaqaatit: Ilisimatusarnermut aamma allaffissornikkut piumasaqaatit ilinniartut piviusunngortitassaat pillugit paasisimasaqarnissaq.
• Inuttut suliatigullu unammillernartut: Inuttut ajornartorsiutit aamma suliatigut apeqqutit pillugit oqaloqatigiinneq.

"Ilinniartuutitta ilinniarnertik tamakkerlugu ingerlalluarnissaminnut pisariaqartitaminnik tapersersorneqarnissaat qulakkeerusupparput", Augustine taama oqarpoq.

Ilinniartut Augustine mailikkut uunga studievejleder@uni.gl imaluunniit oqarasuaammut +299 38 56 23 attavigisinnaavaat.

Sivisunerusumik oqaloqatigiinnikkut ilinniartutut siunnersorneqarnissamut internettikkut piffissamik aamma inniminniisoqarsinnaavoq.

Ilinniartut pitsaanerpaamik atugaqarnissaat anguniarlugu suliniutitsinnut neqeroorut una ilaavoq.