Arnarulunnguaq pillugu atuagaq nutaaq

Soqutiginarluinnartoq Arnarulunnguaq pillugu Pauline Knudsen, Inuiaat Kulturiat Oqaluttuarisaanerannilu immikkoortortaqarfiup pisortaa, atuakkiaminik saqqummersitseqqammivoq.

Issittumi ilisimasassarsiorneq tupinnartoq Arnarulunnguup peqataaffigisimasaa pillugu paasisaqarnerunissamik atuagaq periarfissiisoq Atuagkat nassuiarpaa.

Taanna arnaavoq inuk qunusuitsoq, 1921-p 1924-llu akornanni Kalaallit Nunaanniit Alaskamut 18.000 kilometerinik isorartutigisumik qimusserluni angalaqataasimasoq.

Naak naammassisaa arajutsisassaanngilluinnaraluartoq siornatigut atuakkiarineqanngisaannarnikuuvoq - Arnarulunnguullu nammineerluni oqaluttuani oqaluttuarinikuunngilaa.

Atuakkiamini Pauline Knudsenip Arnarulunnguup inuttut qanoq ittuunera aamma angalanermi pingaarutilimmi qanoq atuuffeqarsimanera paasinarsisikkusussimavaa.

Paulinep saqqummersitsinerani pilluaqqungaarparput.