Ilisimatusarfimmi Suliffissanik Nittarsaassineq aallartippoq

Pisarneq malillugu maani Ilisimatusarfimmi ukiumoortumik suliffissanik nittarsaassineq ingerlapparput - tassani oktobarimi aamma novembarimi ilinniartut Kalaallit Nunaanni inuussutissarsiorneq toqqaannartumik attaveqatigisinnaavaat.

Ilinniakkamik naammassinnittutut ilaatigut imminut aperinarsinnasarpoq; sunik suliaqarsinnaavunga? Inuussutissarsiornerup iluani sumut tulluarpunga?

Ukiut ingerlanerini ilisimasat, teoriit aamma periutsit ilikkarsimasat sulinermut qanoq atulersinneqarsinnaappat?

Ilisimatusarfimmi ilinniartut ilaannut atorfeqarnikkut ingerlaarfissaq paasinarsereerlunilu erseqqissereersinnaasarpoq - ilinniartulli ilaannut tamanna pinnguaatit katitigassatut, katitigassallu ilaannik ujaasinertut issinnaasarpoq.

Taamaammat suliffissanik nittarsaassinermut amerlasuut allatsissimammata Ilisimatusarfimmit nuannaarutigaarput - kattuffiit, naalakkersuisoqarfiit aamma suliffeqarfiit assigiinngitsut ilinniartut qanimut naapinnissaannut soqutiginnimmata soorunami aamma qutsavigingaarpagut.

Aammattaaq neriuppugut ilinniartuutivut amerlasuut siunissartik piffissami aggersumi qanoq isikkoqassanersoq takujartuaalerumaaraat.