2024-mi ilinniartut akuerisaasimasut pillugit misissueqqissaarneq naammassingajalerpoq

Allattoq Joachim Sloth Larsen

Ilinniartut septembari 2024-mi semesterimi siullermi aallartittut pillugit Ilisimatusarfiup misissueqqissaarinini inaarsaleruttorpaa.

Misissueqqissaarneq tamanna pitsaassutsikkut qulakkeerinnittarnermik suliaqarnitsinnut ilaavoq - misissueqqissaarneq ilaatigut ilinniartut tunuliaqutaat pillugit pissanganartunik paasisaqartitsivoq.

Misissueqqissaarnermi inernerit takkutikulasut pingaarnerit aajuku:

• Ilisimatusarfik 2011-miit 2024-mut ilinniartut aallartittunut atatillugu siuariaateqarsimavoq.
• 2024-mi Ilisimatusarfik pingaarnertut arnanik ilinnialertussanik akuersisimavoq - 76 procentii (tamanna ukiuni kingullerni Kalaallit Nunaanni GUX-imit soraarummeertuni arnat amerlassusianit qaffasinneruvoq).
• Ilinniartut akuerineqartut agguaqatigiissillugu 30-ngajannik ukioqarput.
• Ilinniartuutitta nutaat akornanni amerlasuut - nunat killermiunut sanilliullugu - ilinniartitaanerup avataani ilisimasaqalersimallutillu misilittagaqarput.
• Ilinniartuutivut nutaat amerlasuut ilinnialernissaminnut akuerisaanerminni meeraqarput - bacheloritut ilinniartut 38 procentii kiisalu kandidatitut ilinniartut 56 procentii.

Ilinniartut akuerisaasut pillugit misissueqqissaarneq tamaat nittartakkatsinni uani qanittumi aasinnaanngorlugulu atuarsinnaanngorumaarpat.