Suliniut Uppik - siunissami ilisimatusarfiup campusissaa

Suliniut Uppik ilisaritissinnaagatsigu tulluusimaarutigaarput - Ilisimatusarfimmi campusimik alliliinissamik suliniut annertooq pissanganartorlu, TNT Nuup suleqatigineratigut aallartissimasarput.

Suliniut una Ilisimatusarfimmut pingaaruteqaqaaq - ingerlaarneranillu avitseqatigerusuppatsigit, taamaasillunilu ersarissuunissaq aamma ammasuunissaq qitiutinneqarput.

Pisariaqartitanik misissueqqissaarneq

Suliniutip Uppip maannakkut killiffiani pisariaqartitanik misissueqqissaarinerup qitiutinneqarnissaa toqqarsimavarput. Tamanna pilersaarusiornitta pileriartorneranut pingaarutilittut ilaavoq, pissutigalugu campusimi ullumikkut pissutsinik siunissamilu pisariaqartinneqartunik piviusunik suussusiinissatsinnut iluaqutaassammat.

Maannakkut piumasaqaataasunik taamaallaat piviusunngortitsiinnanngitsumik aammattaarli siunissami unammillernartussanut periarfissanullu piareersimasussamik campusimik pilersitserusuppugut.

Soqutigisallit peqataatinneqarnerat

Soqutiginnittutsinnik peqataatitsineq pisariaqartitanik misissueqqissaarinermi qitiusutut inissisimavoq. Ulluinnarni campusimik atuisut siunnersuutaat aallaavigalugit campusip allisinneqarnera taamaallaat iluatsilluarsinnaasoq upperaarput.

Taamaammat piffissami aggersumi takorluugaannik siunnersuutaannillu katersuiniarluta ilinniartunik, sulisunik aamma illuatunginik attuumassuteqartunik allanik workshoppertitsillutalu ataatsimiitsitsisassaagut.

Siunissamut takorluugaq

Ilikkariartornermik, ilisimatusarnermik peqatigiinnermillu siuarsaaffiusumik campusimi ullutsinnut naleqquttumik avatangiiseqarnissaq Suliniummi Uppimmi takorluugaraarput.

Aaqqiissutit ingerlassinerillu nutaaliortut illuutissanik ilusilersuinermut ilanngunnissaat anguniarparput. Tamanna ilutigalugu naleqartitat aamma ileqquliussat Ilisimatusarfimmik immikkuullarissuutitsisut atatiinnarnissaat nukittorsarnissaallu kissaatigaarput.

Ammasumik periuseqarneq & attaveqateqarneq

Suliniutip Uppip ingerlanera tamakkerlugu ammasuunissap pingaaruteqassusaa ilisimavarput.

Taamaammat suliniutip siuariartornera pillugu nittartakkatsinni ingerlaavartumik nutaarsiassiillutalu paasissutissiortarumaarpugut - peqatigiilluta Ilisimatusarfiup siunissaanik ilusilersuinnaajumalluta kikkut tamarmik oqallinnermut malinnaanissaat peqataanissaallu kaammattuutigaarput.