Kalaallit Nunaanni ph.d.-nngorniat ataqqisaasumit legatinnattut

Ilisimatusarfimmi ph.d.-nngorniat Hans Peder Kirkegaard aamma Rikke Østergaard Fulbright Arctic Initiative Scholarship-innapput

Hans Peder Kirkegaard Nasiffimmi - Nunanut Allanut Sillimaniarnermullu Ilisimatusarfimmi ph.d.-nngorniartuuvoq. Taassuma ilisimatusaatigalugu suliaani politikerit aamma naalagaaffiup isertortumik paasiniaasuisa akunnerminni suleqatigiinnerat kiisalu Issittumi nunap inoqqaavisa takornartanit sunniivigineqaratarsinnaanerat qitiutinneqarput.

Nasiffiup danskit Illersornissamut Ministereqarfiat ph.d.-nngorniutinut marlunnut aningaasaliinissaq pillugu suleqatigiinnissamik isumaqatigiissuteqarfigisimavaa, Hans Pederilu legatinnattut ilagaat. Danmarkimi Illersornissamut Ministereqarfiup aamma Naalakkersuisut akornanni Issittumi piginnaasanik annertusaanermut isumaqatigiissutaannik pilersitsinerannut isumaqatigiissut una ilaavoq.

Nunanut allanut Naalakkersuisoqarfimmi illersornissamut sillimaniarnermullu politikkimut suliassaqarfiup iluani Hans Peder siornatigut immikkut siunnersortitut sulisimavoq - 2023-milu septembarimi ph.d.-nngorniarluni aallartilluni.

Rikke Østergaardip ph.d.-nngorniutaani siunertatut paasiniarneqarpoq Kalaallit Nunaanni unammillernartut annertuut pissaanerup aaqqissugaaneranit qanoq pilersinneqartarnersut, kingorna aaqqissugaanermi naligiinnginnernik pilersitsisartut. Taassuma ilisimatusarnera Nunatsinni Ilisimatusarnermik Siunnersuisoqatigiinnit aningaasaliiffigineqarpoq septembarimilu 2024-mi aallartissalluni.

Rikke Issittumi Sakkutooqarfimmi sakkutuujunngitsut sakkutuullu suleqatigiinnerisa iluanni ilisimatusarnermut ataqatigiissaarisutut atorfimminngaanneersuuvoq.

Rikkep Fulbrightimik suliniutaani suiaassutsinut apeqqut aamma Issittumi sillimaniarnermut politikkinik akuutitsisunik ineriartortitsinermut intersektionalitet-imik (inuiaassutsip, suiaassutsip, inuiaqatigiinni inissisimaffik il.il. inullu ataasiakkaap sunniivigeqatigiittarnerannut teorii) atuineq qitiutinneqarput.