Eqqaaniut

Jakob Janussen, toqukkut qimaguteqqammersoq, Ilisimatusarfimmi eqqaamavarput.

Ilisimatusarfik sinnerlugu Jakob Janussen, immikkuullarissumik kinaassusilik inuulluaqquarput, Jakobip inuunera suliaalu Kalaallit Nunaata oqaluttuarisaaneranut ineriartorneranullu malunnaateqartitsisimaqaat.

Jakob Janussenip qanittumi toqukkut qimappaatigut, qimagunneralu inuiaqatigiinnitsinni annertuumik annaasaqarnermik misigititsivoq.

Atorfimmini arlalinni, Jakob Janussen, Namminersornerullutik Oqartussani kingornalu Namminersorlutik Oqartussanngortuni aqutsisutut sulisimavoq. Namminersorneq pillugu Isumalioqatigiissitami siulittaasuusimallunilu namminersorneq pillugu kalaallit qallunaallu isumalioqatigiissitaata allattoqarfiata nunatsinni immikkoortortaanut pisortaasimavoq. Piginnaassuseqarnera tunniusimaneralu Kalaallit Nunaata politikkikkut namminersortutut ineriartorneranut pingaaruteqarsimapput.

Jakob Janussen taamaallaat atorfilittaasimanngilaq, aammattaarli politikikkut oqaaseqartartuusimavoq akuerisaasimasoq. Allaaserisanik atuakkanillu amerlasuunik saqqummersitsisimavoq, taakkunani Kalaallit Nunaata ineriartorneranik misissueqqissaarisarnera isiginnittariaasaalu - tamarmik nunatta siunissaa pillugu oqallinnermut pingaarutilimmik tunniussaqarluarsimapput.

Jakob Janussenip inuiaqatigiinnut malunnaatilimmik tunniussaqarsimanera nersorniarlugu Ilisimatusarfiup 2017-imi ataqqinaammik doktorinngortippaa, ilisimatusarnikkut silassorissusaatigullu innarligassaannginneranut tamanna nersuineruvoq.

Jakob Janussenili aamma ilaquttaminut inuiaqatigiinnullu inuk asannittuusimavoq. Qimatarai nuliani, qitornani ernuttanilu taakkualu annaasaqarnertik aliasuutigaat. Pitsassuarmik ilisimasaqarneranit tunniusimasutullu ilaqutaasuuneranit kingornussat tamatsinnit eqqaamaneqarlutillu pingaartinneqartuassapput.

Jakob Janussenip nunatsinnut tunniusimanera nalilerneqarsinnaanngitsumillu inuiaqatigiinnitsinnut tunniussaqarsimanera puigorneqarunnanngilaq. Eqqarsaatai aamma sunniuteqarfigisimasai siumut ingerlanitsinnut aqqutissiuiuassapput.

Qujamasungaarluta qamanngalu pisumik ataqqinningaarluta Jakob Janussen eqqaamavarput.

Jakob Janussenip eqqaaneqarnera ataqqinartuuli.