Ukraine Ilisimatusarfimmi - tikilluaritsi

Allappugut "massakkorpiaq Ukrainemi toqqaannartumik [suleqateqarnata] - nunatsinnili Ukrainemilu siunersiueqatigisartagaqarnikkut maani Ilisimatusarfimmi ilinniartitsisumik ilinniartunillu marlunnik Ukrainemi universitetimeersunik tikeraartoqarnissamut periarfissaqarnersoq massakkorpiaq."

Suliaq tamanna maanna inerititaqarfiusimavoq - maannalu National University Yuri Kondratyuk Poltava Polytechnic suleqatigiinnissamik isumaqatigiissuteqarfigereerparput.

Suleqatigiinnissamik isumaqatigiissut tamanna tunngavigalugu apriilip 4-anni National Universitymit ilinniartitsisumik ataatsimik ilinniartunillu marlunnik tikeraartoqalissaagut - aggustillu naalernera tikillugu tikeraartorissavavut.

Nunarsuarmioqataanermut Attaveqatigiinnermullu Immikkoortatsinneersut timmisartoqarfimmut tikilluaqqusiartorumaarput taakkulu inisimmavissaannut apuutissallugit.

Ilinniartitsisoq tikeraartussaq ilaatigut Inuussutissarsiornermi aningaasaqarnermut ilisimatusarnermi ilinniartitseqataajumaarpoq.

Ilinniartut tikeraassavut marluk ilaatigut Economic development in the Arctic-imi, Economics I-imi aamma Advanced political science-imi pikkorissaqataassapput.

Soorunami ajornartorsiuteqarsinnaanera eqqumaffigaarput - ass. semesteri aallartereersimassaaq il.il. - uagulli piffissaq ingerlatillugu aaqqiivigineqarsinnaasoraarput.

Aamma soorlu allareersugut, uagut ilinniarfittut inunnut sorsunnermi annilaanganartorsiornermik ulluinnarsiuteqarsimasunut neqerooruteqangaarsinnaanngilagut.

Ukrainemeersulli pingasut tikeraartussatsitut tikilluaqqunerisigut ulluinnarnut utertutut misigiffigisinnaasaannik toqqissisimanarnerusunik avatangiiseqarallartissinnaassavavute.

Ulloq aallartiffissaat tassaavoq apriilip 5-iat, rektorillu ullaakkorsioqatigiittoqarnerani tikilluaqqujumaarpai.

Nunarsuarmioqataanermut Attaveqatigiinnermullu Immikkoortortamit poorskimi isumassorluarneqarumaarput - ilaatigut Nuummi takornariartinneqarumaarput kangerlummilu aalisariaqatigineqassallutik.