Nick Duelund Paasisavut 2023-mi ajugaavoq

Saqqummiussillaqqinneqqisaaffik Paasisavut qangalili pilersaarusiorneqarsimavoq, Ilisimatusarfiup Arctic Hubillu nuannersumik suleqatigiinnerannit ilusiligaalluni.

Paasisavut-mi ajugaaniuttut ukuupput:

Ulunnguaq Markussen: Kalaallit Nunaat nunaavoq ineriartortuarfiusoq, ingammik illoqarfii nunaqarfiilu eqqarsaatigalugit. Pitsaanerpaamilli ineriartortoqarnissaa qanoq qulakkeerneqarsinnaava? Sumiiffinni ataasiakkaani nunaluunniit tamakkerlugu pitsaanerpaamik aaqqiissutissarsiortoqassava?

Nick Duelund: Takusaqarsinnaassuserput inuttut ulluinnarni atorluartakkatta pingaaruteqarnersaannut ilaavoq. Meeqqalli isigiarsunnersut misissuivigineqarnissaat kingornalu isigisaqarlualernissaannut pisariaqartunik ikiorserneqarnissaat nunatta qanoq qulakkeersinnaava?

Naja Carina Steenholdt: Statistikkit naapertorlugit Kalaallit Nunaanni inuuneq tujorminarpoq; inooqatigiinnikkut ajornartorsiutit inuiaqatigiinnilu pisut ajortortaat sammineqarnerusarput. Kalaalerpassuilli inuunerminnik naammagisimaarinninnerarmata kisitsisit qanoq taamaassinnaappat? Inuiaqatigiit allanik pingaarnerutitaqarpat?

Laura Helene Rasmussen: Kalaallit Nunaanni silaannap kissatsikkiartortuarnera qanorpiaq sunniuteqarpa? Laura aasakkut ukiukkullu masarsunni kvælstoffinik taakkualu siunissami qanoq ikkumaarnerannik misissuisarpoq. Siunissamimi masarsuit nunap qeriuaannartup iluanit CO2-mik naasunit pisartagaanit annertunerusumik aniatitsisalissappat?

Elizabeth Cooper: Kalaallit Nunaanni aningaasaqarneq inuussutissarsioriaatsinit assigiinngitsorpassuarnit ingerlanneqarpoq; ilaatigut takornariaqarnermit, issittumi ineriartortuartumit. Umiarsuarnit takornariartaaterpassuarnit nunatsinni tulattartunit takornariartarnerup ilorraap tungaanut ineriartornissaa qanoq qulakkeerneqarsinnaava? Inuit ileqqorissaarnerulersinneqarlutillu paasinninnerulersinneqarsinnaappat, aamma takornariat nunaqavissullu suleqatigiilluarnerulersinneqarsinnaappat?

Saqqummiussillaqqinneqqusaanneq Paasisavut iluatsilluaqaaq - ilisimasatusarnermi ilisimasat qungujunnartumik tamanullu paasiuminartumik saqqummiunneqarmata.

Ilisimatusarfimmi ph.d.-nngorniaq, Nick Duelund, Paasisavut-mi ajugaasutut siullertut toqqagaavoq - Nickilu ajugaanerani Brugsenimillu aningaasaliissutigineqartunik 25.000 kroninnannerani pilluaqqungaarparput.

Assi - assiliisoq: Emil Nørgaard Stach