Forsvarsministeriap Ilisimatusarfiullu ph.d.-nngornianik marlunnik Nasiffimmukartitsinissaq pillugu isumaqatigiissutaat

Forsvarsministeriugallartoq Troels Lund Poulsen Ilisimatusarfimmilu rektori Gitte Adler Reimer ph.d.-nngorniat marluk Nasiffimmut - Nunanut Allanut Sillimaniarnermullu Ilisimatusarfimmukartinnissaannik aningaasaliinissaq pillugu tunngaviusumik isumaqatigiissummik ullumi atsiorput.

Isumaqatigiissummi sakkutooqarnermut, illersornissamut sillimaniarnermullu politikki qitiutinneqarpoq Nasiffiullu soqutigisai pingaartitaalu pillugit aamma Forsvarsministeriap soqutigisaqarfiini periusissiukkamik ilisimatusartoqarnissaa sammineqarluni. Aamma isumaqatigiissummi sillimaniarnermut politikki pillugu illuatungeriinnut tamanut iluaqutaasussamik Kalaallit Nunaanni ilisimaarinninnerusoqalernissaa qulakkeerniarneqarpoq nunatsinnilu nunanut allanut sillimaniarnermullu politikki ataqatigiinnernut tunngatillugu paasisat nutaat saqqummiunneqarlutik.

Ph.d.-nngorniaq siulleq 2023-mi aggustimi aallartissaaq aappaallu 2024-mi aallartissalluni.