Tech aamma Demokratii pillugit isummersuisartuinut
Signe Ravn-Højgaard, ilisimatusartoq Ilisimatusarfimmi atorfeqartoq, Nordisk Ministerrådip Tech aamma Demokratii pillugit isummersuisartuinut ilaasoq nunani avannarlerni demokratiip qanoq nukittorsarneqarsinnaaneranut kajumissaarutinik aqqanilinnik suliaqaqataasimavoq
Signe Ravn-Højgaard, ilisimatusartoq Ilisimatusarfimmi atorfeqartoq, Nordisk Ministerrådip Tech aamma Demokratii pillugit isummersuisartuinut ilaasoq nunani avannarlerni demokratiip qanoq nukittorsarneqarsinnaaneranut kajumissaarutinik aqqanilinnik suliaqaqataasimavoq.
![](/img/quote.png)
"Tamanna pingaaruteqarpoq, tassami inuiaqatigiinni ammasumik oqallinnerup ilarujussua internettikkut nittartagaqarfissuarni nunani tamalaani ingerlatsisuni demokratiip nukittorsarneqarnissaa pivallaarnagu aningaasatigut isertitaqarluarnissamik pingaartitsinerusuni ingerlanneqarmat", Signe Ravn-Højgaard oqarpoq.
Isummersuisartoqatigiinni isumaqatigiissutigineqarsimavoq nittartagaqarfissuit politikkikkut nakkutigineqarnerunissaat pisariaqarluinnartuusoq.
"Tamannali ajornakusoorpoq", Signe Ravn-Højgaard oqarpoq. "Tassami teknologii tupinnaannartumik sukkaqisumik ineriartormat inatsisiliortunut malinnaaffigissallugu ajornarluinnangajappoq - aammami nittartagaqarfissuit taama angitigitillugit siammarsimatigitillugillu nunat namminneq iluminni malittarisassiorlutillu inatsisiliornissaat sunniuteqangaarnavianngilaq".
Taamaattumik isummersuisartoqatigiit kajumissaarutaat aqqaniliusut ukuupput:
- Nunani avannarlerni teknologiimut demokratiimullu paasissutissaqarfiliortoqassasoq Europami teknologiimut malittarisassat atuutsinneqarnerannut tapersersuisussamik, misilittakkanik paarlaateqatigiiffiusussamik politikkinillu nutaanik ineriartortitsiviusussamik.
- Meeqqat inuusuttullu internettikkut nittartakkanik atuinerminni atugarissaarnissaat illersorneqarnissaallu aqqutissiuunneqassasoq nalinginnaasumillu innuttaasunut illersuutaasumik nakkutiginnittoqarnerulissasoq.
- Qarasaasianik atuinermi ileqqorissaarnissaq pillugu ilisimasaqarfimmik internettikkoortumik pilersitsisoqassasoq.
- Internettikkut attaveqatigiittarfiit demokratii tunngavigalugu oqalliffiusut sullinneqarneranni namminneq piumassutsiminnik sulisut tapersersorneqarlit.
- Nittartagaqarfissuit atuuttut saniatigut internettikkut tamanut ammasumik oqalliffeqarnermut periarfissanik allanik ineriartortitsinerup atortulersuinerullu siuarsarneqarnissaa.
- Tusagassiorfiit innuttaasunut kiffartuussiviusut internettikkut peqataalluarnissaannut nukittorsarneqarnissaat, aallakaatitassiornikkut oqallittarfinnillu ineriartortitsinikkut.
- Eqqortumik paasissutissiisoqartarnissaanik misissuisartunut tapiissuteqarnerulernissaq.
- Nunani avannarlerni aallakaatitassianik aqutsisoqarnikkut pitsanngorsaanissaq.
- Qarasaasiat namminneq paasissutissiortarneratigut eqqunngitsunik paasissutissaqartitsisinnaanerup demokratiimut navianaataanut akiuiniaqatigiinnik pilersitsinissaq.
- Nittartakkani paasissutissanik pissarsisinnaanermut ilisimatusartullu arlaannaannulluunniit pituttugaanngitsut atugassaannik algoritmeqarnermut (ilitsersuusiornermut) tapiissuteqartarnissaq.
- Nunani avannarlerni qarasaasiatigut demokratii pillugu ukiunut marlunnut atuuttumik nalunaarusiortitsinissaq.
Nalunaarusiaq kajumissaarutillu aqqaniliusut nunani allanissaaq tusagassiuutitigut sammineqarput - soorlu ukunani:
- Tænketank i opråb til politikere: Sæt tidsbegrænsning på børns adgang til sociale medier (dr.dk)
- Anbefalinger for tech og demokrati og medieansvar i sløring af mistænkte (dr.dk)
- Kulturminister åbner dør for øget forældrekontrol med børns sociale medier (berlingske.dk)
- Politiken-journalist: Jeg brugte 18 timer om ugen på TikTok. Nu kan de rammer, jeg havde brug for, være på vej (politiken.dk)
- Efter et års arbejde er tænketank klar med anbefalinger til håndtering af tech (mediawatch.dk)