Periarfissaq kingulleq - Kalaallisut sumiorpaluutit kulturikkut kingornussarsiaralugit

Københavns Universitet Ilisimatusarfik, Nunatta Katersugaasivia Allagaateqarfialu Danmarkimilu Nationalmuseet suleqatigalugit Augustinusfonden-imit 3,8 millionit kroninnappoq kalaallisut sumiorpaluutit pillugit paasissutissanik katersuinermut, misissueqqissaarnermut ingerlatitseqqiinissamullu atugassanik.

Suliniummi siunertarineqarpoq kalaallisut suimiorpaluutit pillugit paasissutissanik katersuillunilu misissueqqissaarlunilu ingerlatitseqqiinissaq Kalaallit Nunaanni Danmarkimilu suliffeqarfiit assigiinngitsut suleqatigiissinnerisigut.

Kalaallisut oqaatsit ilisimatuutut misissuivigilluarneqarsimanngillat, aamma ilisimatuutut misissuivigineqarpianngilaq kalaallisut oqaatsit nunami sumiiffinni utoqqaassutsinilu assigiinngitsuni qanoq atugaanersut. Aammattaaq malunnarpoq kalaallisut sumiorpaluutit atuukkunnaariartortut, kalaallit inuusuttorpassuit oqaloriaatsitik kitaani sumiorpaluutinut naleqqussartarmatigit.

Suliniummi kalaallisut sumiorpaluutit maanna qangalu atuuttut assigiinngisitaarnerat oqaatsinik ilisimatusaatitut allaaserineqassaaq kalaallisullu oqaloriaatsit sumiiffiit, suiaassutsit ukiullu aallaavigalugit allami katersugaatigineqanngitsunik aaqqissuuteqqissaakkamik immikkut ittumik digitalinngorlugit katersorneqassallutik.

Kalaallisut sumiorpaluutinik immiussinikkut immiussanillu allattuinikkut neriuutigineqarpoq suliniut Kalaallit Nunaanni oqaatsinut tunngatillugu kulturikkut kingornussarsianut tapiissutaalluassasoq – kalaallisullu oqaatsit qanoq atugaanerannik katersugaateqarneq ullumikkut siunissamilu pingaaruteqangaassaaq.

Suliniut ingerlanneqassaaq sumiiffinni eqqaaneqartuni ilisimatuut, ingerlatitseqqiisartut innuttaasullu qanimut suleqatigiinnerisigut. Anguniarneqarpoq podcastit webdoksillu aqqutigalugit ingerlatitseqqiisoqarnissaa – aammali Nunatta Katersugaasiviani aamma Danmarkimi Nationalmuseet-mi saqqummersitsinikkut.

Sulisut:

• Lektori Marie Maegaard, Sprogforandringscentret (NorS, KU)
• Lektori Naja Blytmann Trondhjem (Grønlandske og Arktiske Studier, TORS, KU)
• Tikaajaat Kristensen (Ilisimatusarfik)
• Marie Møller Udvang (Grønlandske og Arktiske Studier)
• Ortu Bogoni Mørch (Studieskolen, København)
• ilinniartoq il.il.