Suliffimmi avatangiiseq

Pillugu

Tamanna misissorniarneqalerpoq Ilisimatusarfiup Syddansk Universitetillu (SDU) suleqatigiillutik ilisimatuutut misissuineranni. Maannamut Kalaallit Nunaanni suliffimmi avatangiisinik ilisimatuutut misissuinernik naammassinnittoqarsimanngilaq, taamaattumillu ilisimatuutut misissuinikkut suliffeqarfiit suliffimmi avatangiisinik qanoq nakkutiginnilluartiginersut – inatsisillu Danmarkimiit ’tiguinnakkallusooq’ Kalaallit Nunaanni pissutsinut piviusunut suliffeqarfiillu pisariaqartitaannut qanoq naleqqutsiginersut – paasiniarnissaanut pingaarutilimmik nutaamik periarfissaqalerpoq.

Danmarkimi Arbejdsmiljøforskningsfonden DKK 1,9 mio.-nik ilisimatusaatigalugu suliarineqalerlaamut namminersorlutik ingerlatsisut pisortallu ingerlatsivii suliffimmi avatangiisit pillugit suliniutiminnik qanoq nakkutiginnittarnerannik misissuiviusussamut, aningaasaliissuteqarpoq. Matumani ilisimalikkat suliffeqarfinni ataasiakkaani suliffeqarfiillu oqartussaasunit suliffeqarfeqarfiillu immikkoortuinit tapersersorneqarneranni suliniutinik pitsaanerulersitsinissamut periarfissanik suussusersiinissamut atorneqassapput. Suliami ilaapput suliffeqarfinnik qulingiluat ataallugit sulisulinnik apersuinermi immersugassat atorlugit apersuineq suliffeqarfinnullu anginernut sisamanut ornigulluni itisiliillunilu misissuinerit.

Suliaq ingerlanneqassaaq suliffeqarfiit anginerit sisamat qanimut suleqatigalugit: Royal Greenland, Royal Arctic Line, Permagreen aamma Pisiffik. Taakkua saniatigut suliffeqarfeqarfiit immikkoortui oqartussaasoqarfiillu suliamik nakkutilliillutillu naliliisussatut peqataatinneqartut ukuupput: Sulisitsisut, SIK, Sullivinnik Nakkutilliisoqarfik aamma Inuussutissarsiornermut, Nukissiuteqarnermut, Ilisimatusarnermut Suliffeqarnermullu Naalakkersuisoqarfik.