Rockwell Kent

Pillugu

Nunatsinni Ilisimatusarfik-iup Ameerikkamilu ilisimatusarfiit marluusut Rochester Institute of Technology-p kiisalu Binghamton University-p suleqatigiilluarnerisigut ilisimatusaatigalugu suliaqarnissamik National Science Foundation-mit kiisalu Arctic Social Science Program-mimit ukiuni marlunni atuuttussamik aningaasaliissutinik akuersissuteqartoqarpoq.

Misissuinissaq qulequtaqartinneqarpoq Rockwell Kent and Early 1930s Greenland: A Comparative View of Environmental, Social and Cultural Change in Comtemporary Greenland. Suleqatigiit tassaapput Jette Rygaard Ilisimatusarfik-meersut kiisalu Ameerikkameersut Denis Defibaugh aamma Susan Vanek.

Piffissami aggersumi Rockwell Kent-ip nunatsinniinnermini suliarisimasaanik assigiinngittunik katersuineqassaaq, soorlu qalipagarisarsimasaanik, assilisaanik, allagarisarsimasaanik allanillu ilisimatusarnermi atorneqarsinnaasunik katersugaasivinni, allagaateqarfinni toqqorsivinnilu suleqatigiinnikkut katersukkanik tamakkuninnga nalunaarsuisoqassalluni.

Rockwell Kent 1931-miik 1932 ilanngullugu Illorsuarni ukiisimasoq, assiliinermik suliaqartarluni qalipaasarlunilu, kingornalu nunatsinni ukiinini atuakkiarisimallugu, tamatumalu saniatigut Salamina Legacy-mik taasaminik aningaasaaateqarfiliorsimalluni nunatsinneersut qinnuteqarfigisinnaasaannik. Illorsuarni, Uummannami, Sisimiuni Nuummilu innuttaasunik tamanut ammasumik ataatsimiisitsineqartassaaq taamatullu atuarfeqarfiit ilaannik suleqateqartoqassalluni, apersuisoqarlunilu misissuinertalimmik  Soorlu inuuniarnikkut sunniutaasimasut tamakkulu allanngoriartorneri ataqatigiissuteqarsinnaanerilu piffinni taaneqartuni ilisimatusaatigalugu misissuinikkut suleqatigiissutigineqassallutik.

Meeqqat atuarfiini atuartut piffinni taaneqartuni suleqatigineqassapput assigiinngittunik sammisaqartinneqartassallutik, kingornalu suliat ataatsimut katersorneqareerpata nunasiaataanerup nalaani ullumikkullu atugassarititaasunut sanilliunneqassallutik, taamatullu inooriaatsip allanngoriartorneri pissutsit atuuttut naleqqussarfigineqartarsimaneri ilanngullugit suleqatigiinnit allaaserineqassallutik.

Nikon-ip ajunngisaarneratigut assiliissutinik qajannaallisakkanik tunissuteqarfigineqarpugut, angalenerillu Polar Field service-imit aningaasaliiffigineqarlutik.